اسلام آباد: پاکستان نے جرمنی کے شہر فرینکفرٹ میں اپنے قونصل خانے پر حملے کو شرپسندوں کی کارروائی قرار دے دیا۔

ترجمان دفتر خارجہ نے جرمنی میں پاکستانی قونصلیٹ پر ہونے والے حملے پر رد عمل دیتے ہوئے کہا کہ پاکستان فرینکفرٹ میں اپنے قونصل خانے پر شرپسندوں کے حملے اور غنڈا گردی کی شدید مذمت کرتا ہے۔

ترجمان کا کہنا تھا کہ پاکستان صورتحال کے تناظر میں جرمن حکام کے ساتھ رابطے میں ہے، پاکستان یہ بات یقینی بنانے کی کوشش کر رہا ہے کہ ایسی صورتحال دوبارہ رونما نہ ہو۔

ترجمان دفتر خارجہ کی جانب سے کہا گیا ہے کہ پاکستان اس بات کو یقینی بنا رہا ہے کہ شر پسند پر قانونی نتائج کا سامنا کریں، پاکستانی کمیونٹی سے اپیل ہے کہ وہ صبر و تحمل کا مظاہرہ رہا کریں۔

ترجمان نے کہا کہ جرمن حکومت پر زور دیتے ہیں کہ وہ ویانا کنونشنز کے تحت اپنی ذمہ داریوں کو پورا کرنے اور جرمنی میں پاکستانی سفارتی مشنز اور عملے کی سلامتی کو یقینی بنانے کے لیے فوری اقدامات کرے۔

دفتر خارجہ کی ترجمان کا مزید کہنا تھا کہ ہم جرمن حکام پر بھی زور دیتے ہیں کہ وہ کل کے واقعے میں ملوث افراد کو فوری طور پر گرفتار کریں اور ان کے خلاف کارروائی کریں، سیکیورٹی کی خامیوں کے ذمہ دار افراد کو بھی جوابدہ ٹھہرائیں۔

واضح رہے کہ جرمنی کے شہر فرینکفرٹ میں افغان شہریوں نے احتجاج کے دوران پاکستانی قونصل خانے پر دھاوا بول ڈالا، مشتعل افغان شہریوں کی جانب سے قونصیلت کی عمارت پر پتھراؤ بھی کیا گیا، حملے کے بعد افغان شہری قونصل خانے کے باہر لگا پرچم بھی اتار کر لے گئے۔

جرمن وزارت خارجہ کی جانب سے پاکستانی سفارتی حکام کو مکمل تحقیقات کی یقین دہانی کروائی گئی ہے جبکہ واقعے میں ملوث متعدد افراد کی گرفتاری کا بھی دعویٰ کیا ہے۔