بجلی کی قیمت میں7روپے 12پیسے فی یونٹ تک اضافے کی درخواست پر سماعت مکمل ہونے کے بعد نیپرانے فیصلہ محفوظ کرلیا۔

نیپرا اتھارٹی اعداد وشمارکا تفصیلی جائزہ لینے کے بعد فیصلہ جاری کریگی۔ نیپرا اتھارٹی اپنا فیصلہ وفاقی حکومت کو بھجوائے گی۔  وفاقی حکومت بجلی کی قیمت کے حوالے سے نوٹیفکیشن جاری کریگی۔

بجلی کی قیمت میں اضافے کے معاملے پرحکومت کی درخواست پراسلام آباد میں نیپرا میں سماعت کے دوران پاورڈویژن حکام نے بتایا کہ بجلی کی قیمت کا تعین 300 روپے فی ڈالرکی شرح پرکیا گیا، کیپسٹی پیمنٹس میں گزشتہ سال کی نسبت 38 پیسے فی یونٹ اضافہ ہوا۔

پاور ڈویژن نے بتایا کہ گھریلو صارفین کے لیے490 ارب روپے کی سبسڈی دی جائے گی، 86 فیصد گھریلو صارفین کو 4 سے 7 روپے تک ریلیف دیا گیا، ڈسکوزکے صارفین کو730 ارب کی کراس سبسڈی فراہم کر رہے ہیں۔

چیئرمین نیپرا نے بتایا کہ ہم توٹیرف بڑھا رہے ہیں پھر یہ کم کیسے ہورہا ہے، جون کے مہینے کی ایڈجسٹمنٹ جولائی میں ختم ہوجائے گی۔ عام آدمی کو لگتا ہے کہ اس کا بل بڑھ جائے گا، ہم یہ یقین دلاتے ہیں کہ کوئی بڑا اضافہ نہیں ہوگا۔

پاور ڈویژن حکام نے بتایا کہ اس اضافے کے بعد بجلی صارفین کا بل جون کی نسبت کم آئے گا، ایڈجسٹمنٹ ختم ہونے سے بجلی صارفین کا بل مزید کم ہوجائے گا، نیپرا نے گھریلوصارفین کیلئے 9 روپے 18 پیسے اضافہ تجویزکیا، وفاقی حکومت نے 200یونٹ تک اضافہ واپس کرایا، اب گھریلو صارفین کو4 روپے10 پیسےکا ریلیف ملے گا۔