اسلام آباد: وزیراعظم محمد شہباز شریف نے کہا ہے کہ حفاظتی خطرات والے علاقوں میں پولیو ویکسین کی فراہمی یقینی بنائی جائے۔

وزیراعظم شہباز شریف سے انسداد پولیو کی قومی ٹیم کی ملاقات ہوئی جس میں انسداد پولیو کے حوالے سے حکمت عملی پر بریفنگ دی گئی۔

ملاقات میں وزیراعظم کو انسداد پولیو سے متعلق دو، چار اور چھ مہینے کے پلان کے حوالے سے بھی آگاہ کیا گیا۔

ملاقات کے دوران بریفنگ دی گئی کہ 2024 میں اب تک ملک بھر سے رپورٹ ہونے والے پولیو کیسز کی تعداد 9 ہو چکی ہے، ستمبر، اکتوبر اور دسمبر 2024 میں پولیو ویکسین کی ملک گیر مہم کا انعقاد کیا جائے گا۔

بریفنگ میں بتایا گیا کہ ایسے بچے جو کہ پولیو ویکسین پینے سے محروم رہ گئے ان کے ڈیٹا کو ڈیجیٹائز کیا گیا ہے تا کہ ڈیجیٹل ٹریکنگ کی مدد سے ان کی ویکسینیشن کی جا سکے۔

دوران ملاقات وزیراعظم نے ہدایت دی کہ ملک سے پولیو کے مکمل خاتمے کے لیے ریاست کے تمام ذخائر بروئے کار لائے جائیں، ایسے علاقے جہاں سیکیورٹی کے حوالے سے چیلنجز درپیش ہیں وہاں ہر بچے کو پولیو ویکسین کی فراہمی یقینی بنائی جائے۔

انہوں ںے مزید کہا کہ فرنٹ لائن ورکرز کی لگن، حکومت پاکستان کے عزم اور پارٹنرز کے تعاون سے  پاکستان نے پولیو کے خلاف اہم پیش رفت کی ہے، یہ امر تشویشناک ہے کہ پاکستان ان دو ممالک میں سے ایک ہے جہاں پولیو کا چیلنج موجود ہے۔

واضح رہے کہ ملاقات میں وزیر اعظم کے کوآرڈینیٹر برائے قومی صحت ڈاکٹر ملک مختار احمد بھرتھ، وزیراعظم کی فوکل پرسن برائے انسداد پولیو ڈاکٹر عائشہ رضا فاروق، ی قومی صحت ڈاکٹر ندیم محبوب اور نیشنل کوآرڈینیٹر برائے انسداد پولیو محمد انوار الحق بھی موجود تھے۔