وزیر تعلیم وزیر تعلیم رانا سکندر حیات نے کہا کہ میٹرک اور انٹر ٹیک پاکستان کی تاریخ میں پہلی مرتبہ شروع ہو رہا ہے۔

وزیر تعلیم رانا سکندر حیات نے 300 پبلک اسکولوں میں مڈل، میٹرک، انٹر ٹیک شروع کرنے کے منصوبہ کا آغاز کر دیا ہے اور اس حوالے سے وزیر تعلیم نے ایجوکیشن ڈیپارٹمنٹ کے افسران کو ٹاسک دے دیا گیا ہے۔

وزیر تعلیم رانا سکندر حیات کی زیر صدارت مڈل، میٹرک اور انٹر ٹیک کے آغاز حوالے سے جائزہ اجلاس ہوا جس میں وزیر تعلیم نے ٹیک ایجوکیشن کورسز کی تیاری کیلئے مشاورتی کمیٹی بنانے کی ہدایت دی۔

اجلاس میں وزیر تعلیم کو ساؤتھ پنجاب میں جاری مڈل ٹیک کے پائیلٹ پراجیکٹ پر بریفنگ دی گئی، جبکہ اجلاس میں میٹرک اور انٹر میں ٹیکنالوجی کورسز کے آغاز پر مشاورت اور تجاویز کا تبادلہ کیا گیا۔

 وزیر تعلیم نے اجلاس کے دوران کہا کہ مارکیٹ کی ڈیمانڈ کے مطابق ٹیکنیکل کورسز متعارف کروائے جائیں، اس کے علاوہ ٹیک ایجوکیشن کیلئے کورس و مواد کی تیاری کیلئے کمیٹی بنائی جائے گی،  کمیٹی ٹیک لیبز میں دستیاب سہولیات و ضروریات کا جائزہ لے کر وے فارورڈ بنائے گی۔

رانا سکندر حیات نے ہدایت  دیتے ہوئے کہا کہ ٹیکنیکل کورسز کی ایریا وائز ڈیمانڈ کو بھی مدنظر رکھا جائے۔

وزیر تعلیم نے یہ بھی کہا کہ نارتھ، ساؤتھ اور سنٹرل پنجاب کی الگ الگ مارکیٹ ڈیمانڈز اور ویلیوز ہیں، جس علاقے میں جو مارکیٹ رجحان ہو، اسی کے مطابق ٹیکنیکل کورس ڈیزائن کیا جائے، اس کے علاوہ ہر تحصیل میں کم از کم 2 ٹیک ایجوکیشن سنٹرز بنائے جائیں۔

 رانا سکندر حیات نے کہا کہ لڑکیوں کیلیے الگ ٹیک کورسز متعارف کروائے جائیں، ڈگریوں کے ساتھ ساتھ اسکلز پر عبور حاصل کرنا لازم و ملزوم ہو چکا ہے، جبکہ دستیاب سہولیات سے زیادہ سے زیادہ استفادہ کیا جائے۔

وزیر تعلیم نے مزید یہ بھی کہا کہ ٹیک لیبز کو اپ گریڈ کیا جائے، پہلے مرحلے میں 300 اسکولوں کو ٹیک اسکولز کا درجہ دیا جائے، جبکہ پائیلٹ پراجیکٹ کی کامیابی کے بعد ٹیک ایجوکیشن کا دائرہ کار دیگر اسکولوں تک پھیلایا جائے۔