اسلام آباد: وزیرِ اعظم محمد شہباز شریف نے کہا کہ پاکستان اپنی “ویژن سنٹرل ایشیا” پالیسی کے مطابق تاجکستان سمیت وسطی ایشیائی ممالک کے ساتھ بہتر روابط کو جاری رکھے گا۔

 وزیر اعظم شہباز شریف نے تاجکستان کے وزیر اعظم قاہر رسول زادہ سے آج دوشنبہ میں ملاقات کی جس میں باہمی دلچسپی کے تمام شعبوں میں دوطرفہ تعاون کے فروغ پر اطمینان کا اظہار کیا گیا اور پاکستان و تاجکستان کے مابین موجودہ برادرانہ تعلقات کو مزید مضبوط بنانے کی مشترکہ خواہش کا اعادہ کیا گیا۔

 ملاقات میں وزیراعظم نے تاجک وزیراعظم کو تیسری اعلیٰ سطحی آبی کانفرنس کے کامیاب انعقاد پر مبارکباد دی اور آبی سفارت کاری کے شعبے میں تاجکستان کے قائدانہ کردار کو سراہا۔

 اسٹریٹجک شراکت داری کے معاہدے پر دستخط کو پاکستان اور تاجکستان کے درمیان دوطرفہ تعلقات میں ایک تاریخی سنگ میل قرار دیتے ہوئے وزیراعظم نے اس امید کا اظہار کیا کہ دونوں ممالک کے درمیان تعلقات کی اس بلندی سے باہمی طور پر مفید اقتصادی تعاون کے نئے شعبوں میں تعاون کو فروع ملے گا۔

شہباز شریف نے کہا کہ پاکستان اپنی “ویژن سنٹرل ایشیا” پالیسی کے مطابق تاجکستان سمیت وسطی ایشیائی ممالک کے ساتھ روابط کے مزید فروغ کو جاری رکھے گا۔

ملاقات کے دوران وزیر اعظم نے خطے کی پائیدار اور طویل مدتی سماجی و اقتصادی ترقی اور جنوبی اور وسط ایشیائی خطے میں علاقائی روابط کی اہمیت پر بھی زور دیا۔

وزیراعظم نے تاجک وزیراعظم کو کراچی بندرگاہ کو ٹرانزٹ تجارت کے لیے استعمال کرنے کی دعوت بھی دی اور کہا کہ دونوں ممالک کے درمیان ریل ٹریکس اور سڑکوں کی تعمیر سے علاقئی روابط کو مزید فروغ دیا جا سکتا ہے۔

اس موقع پر وزیراعظم نے وسط ایشیائی ممالک کو تجارتی راہداری فراہم کرنے اور علاقائی تجارت کے فروغ کے لیے پاکستان کی جانب سے علاقائی کنیکٹیویٹی سمٹ کی میزبانی کی تجویز پیش کی۔

دوران ملاقات وزیراعظم نے پاکستان اور تاجکستان کے مابین شروع ہونے والی حالیہ بین الاقوامی پروازوں کا خیر مقدم کیا اور ان پروازوں کی تعداد میں اضافے کی اہمیت پر زور دیا۔

شہباز شریف نے دونوں ممالک کے مابین سماجی روابط کو مزید توسیع دینے کی ضرورت پر بھی زور دیتے ہوئے کہا کہ تاجک اور پاکستانی عوام کے مابین مزہبی اور ثقافتی اقدار مشترک ہیں۔

اس دوران وزیراعظم نے ثقافت، تعلیم، کھیلوں اور عوام سے عوام کے روابط کے شعبوں میں تعاون کے فروغ کا بھی اعادہ کیا۔

واضح رہے کہ وزیراعظم تاجکستان کے صدر عزت مآب امام علی رحمان کی دعوت پر تاجکستان کے دو روزہ سرکاری دورے پر تاجکستان کے دارالحکومت دوشنبہ میں ہیں۔