وزیر بلدیات سندھ و صدرپاکستان پیپلز پارٹی کراچی ڈویژن سعید غنی نے کہا ہے کہ محرم الحرام کے بعد پیپلز پارٹی کراچی میں ایک عظیم الشان جلسہ عام کرے گی۔

سعید غنی کا کہنا ہے کہ پارٹی کے تمام نئے ضلعی عہدیداران کراچی میں پارٹی کو مضبوط اورمستحکم کرنے اورنئے کارکنوں کو پارٹی میں شامل کرنے پرتوجہ مرکوز کریں۔ تمام اضلاع آئندہ سال کنٹونمنٹ کے انتخابات کے لئے تیاریاں شروع کردیں، جلد ہی اس سلسلے میں اہم اجلاس منعقد کیا جائے گا۔

پیپلزسیکرٹریٹ میں پاکستان پیپلز پارٹی کراچی ڈویژن کے اہم اجلاس کی صدارت کرتے ہوئے کہا کہ تمام نومنتخب عہدیداران پارٹی کے نظم و ضبط کو ہر صورت یقینی بنائیں گے اور ہماری کوشش ہونی چاہیے کہ اس شہر میں پارٹی مزید مضبوط ہو اورنئے کارکنان اس میں شامل ہوں اس ہے لئے اقدامات کریں۔

سعید غنی نے کہا کہ تمام سابقہ عہدیداران نے پارٹی کو مستحکم کرنے میں اپنا کردار ادا کیا ان کو بھی خراج تحسین پیش کرتے ہیں۔  انھوں نے ہدایات کی کہ تمام عہدیداران روزانہ کی بنیاد پر اپنے اپنے ڈسٹرکٹ میں عوام سے رابطے کو تیز کریں گے۔

سینئرصوبائی وزیر سندھ نے کہا کہ ایک سال بعد کنٹونمنٹ کے انتخابات ہونے ہیں اس کے لئے تمام تیاریوں کا آغاز کردیں اور جلد ہی اس سلسلے میں اجلاس طلب کیا جائے گا۔ پارٹی میں اختلاف رائے ضرور ہوتے ہیں اورہونا بھی چاہیے۔

سعید غنی نے مزید کہا کہ کسی بھی تنظیم کے پاکستان بھرمیں اتنے اجلاس نہیں ہوتے جو پیپلز پارٹی کراچی ڈویژن کے ہوتے ہیں۔ نئے عہدیداران کی ذمہ داریاں زیادہ ہوگئی ہیں اوران کی ذمہ داریوں میں ناراض کارکنان کو بھی ساتھ لے کر چلنا ہے۔ محرم الحرام کے بعد کراچی ڈویژن کے تحت ایک عظیم الشان جلسہ منعقد کیا جائے گا۔

اجلاس کے دوران شہید قائدین اورپارٹی کے شہید کارکنوں بالخصوص ڈسٹرکٹ کورنگی میں کچھ دنوں میں 2 شہید ہونے والے کارکنوں کی مغفرت کے لئے دعا کروائی۔

اس موقع پر تمام نومنتخب صدور، سنئیر نائب صدور، جنرل سیکرٹریز اور انفارمیشن سیکریٹریز نے اپنا تعارف کروایا اور چیئرمین بلاول بھٹو زرداری، شریک چیئرمین آصف علی زرداری، ادی فریال، نثار احمد کھوڑو، وقار مہدی اور سعید غنی کا شکریہ ادا کیا اور اس عزم کا اعادہ کیا کہ وہ پارٹی کو کراچی میں مزید فعال اور مستحکم بنانے میں اپنا کردار ادا کریں گے۔

اجلاس میں پیپلزپارٹی سندھ کے جنرل سیکرٹری و وزیراعلٰی سندھ کےمعاون خصوصی سید وقار مہدی، مرزا مقبول، خالد صابن والا، ذوالفقار قائمخانی، ڈپٹی انفارمیشن سیکرٹری آصف خان، شکیل چوہدری، تمام نومنتخب ڈسٹرکٹ کے صدور، سنئیر نائب صدر، جنرل سیکرٹریز و انفارمیشن سیکرٹریز نے شرکت کی۔

 اجلاس میں پیپلز یوتھ، پیپلز اسٹوڈنٹ فیڈریشن، پیپلز ڈاکٹر فورم، پیپلز لائرز فورم، پیپلز انجنئیرنگ، پیپلز منارٹی ونگ سمیت تمام ذیلی تنظیموں کے عہدیداران بھی شریک تھے۔