وزیراعظم محمد شہباز شریف پاکستانی وفد کے ہمراہ تاجکستان کے دو روزہ دورے پر دوشنبہ پہنچ گئے۔

دوشنبہ ائیرپورٹ پر تاجک وزیراعظم عزت مآب قاہر رسول زادہ، تاجک وزیر توانائی و آبی وسائل دلیر جمعہ، تاجک نائب وزیر خارجہ فرخ شریف زادہ، دوشنبہ کے مئیر جمشید تبر زادہ اور پاکستان میں تاجکستان کے سفیر یوسف شریف زادہ، تاجکستان میں پاکستان کے سفیر محمد سعید سرور اور اعلی سرکاری و سفارتی اہلکاروں نے وزیرِ اعظم کا استقبال کیا۔

دوشنبہ ائیرپورٹ پر وزیراعظم محمد شہباز شریف سے تاجک وزیراعظم عزت مآب قاہر رسول زادہ کی ملاقات اور رسمی گفتگو ہوئی۔

وزیراعظم دوشنبہ میں اسماعیل سامانی کی یادگار پر پہنچے جہاں انہوں نے پھولوں کا گلدستہ رکھا، اسماعیل سامانی وسط ایشیا کی تاریخ شخصیت اور تاجکستان کا قومی ہیرو ہے جس نے نویں اور دسویں صدی میں تاجکستان اور خراسان کے علاقے پر حکومت کی اور تاجک قوم کو تاریخ ساز ترقی کی راہ پر گامزن کیا۔

  وزیراعظم شہبازشریف تاجک صدرامام علی رحمان کی دعوت پردورہ کررہے ہیں، اس موقع پر دوشنبہ میں وزیراعظم تاجکستان کی اعلیٰ قیادت سے ملاقات کریں گے۔

وزیراعظم شہبازشریف تاجکستان دورے کے دوران تاجک صدرامام علی رحمان  اور تاجک وزیراعظم قاہر رسولزادہ سے ملاقات کریں گے اس کے علاوہ وزیراعظم کی تاجک پارلیمنٹ کے ایوان زیریں کے چیئرمین سے بھی ملاقات ہوگی۔

 ملاقات میں تجارت، سفارتی وسماجی تعلقات، توانائی اوردیگر شعبوں میں باہمی اشتراک پرتبادلہ خیال ہوگا اس کے علاوہ مختلف شعبوں میں معاہدوں اورمفاہمت کی یادداشتوں پربھی دستخط کئے جائیں گے۔

 واضح رہے کہ 2 روزہ سرکاری دورہ پاکستان اورتاجکستان کےدرمیان اعلیٰ سطح تبادلوں کاحصہ ہے۔