کراچی میں نو محرم الحرام کا جلوس نشتر پارک سے برآمد ہوگیا ہے، جلوس کے اطراف سکیورٹی کے سخت انتظامات کئے گئے ہیں۔

نشتر پارک میں 9 محرم کی مرکزی مجلس کا آغاز ہوگیا، شہنشاہ حسین نقوی مجلس سے خطاب کر رہے ہیں، مجلس کے بعد جلوس برآمد ہوگا۔

سکیورٹی کے حوالے سے مختلف علاقوں میں موبائل فون سروس  بھی بند ہیں، جبکہ پولیس اور رینجرز کے دستے نمائش چورنگی پہنچ گئے۔

جلوس کے اطراف آنے والے تمام سڑکیں اور گلیاں کنٹینرز لگا کر بند کی گئی ہیں، اس کے علاوہ کراچی میں 9 محرم کے جلوس کی گزرگاہ کی طرف آنے والی گلیوں اور راستوں کو سیل کر دیا گیا۔

ایم اے جناح روڈ، کوریڈور3 اور صدر کے مختلف مقامات پر کنٹینر رکھ کر راستے بند کردیے گئے  ہیں، جبکہ جلوس کے روٹ پر پولیس اور رینجرز اہلکار تعینات ہیں۔

جلوس کی کمانڈ اینڈ کنٹرول روم میں سی سی ٹی وی کی مدد سے نگرانی کی جائے گی، جبکہ جلوس کے پیش نظر  ٹریفک کے لیے متبادل راستوں کا پلان جاری کردیا گیا ہے۔

مرکزی جلوس نشتر پارک سے روانہ ہو کر مقررہ راستوں سے ہوتا ہوا حسینیہ ایرانیاں کھارادر پر اختتام پزیر ہو گا، جبکہ چھوٹی یا بڑی ٹریفک کو گرومندر چوک سے آگے جلوس کے راست پر جانے کی اجازت نہیں ہوگی۔

9  اور 10 محرم الحرام کے دوران کراچی پولیس کے 17 ہزار 947 افسران و اہلکار سیکیورٹی پر تعینات کیے جائیں گے، اس کے علاوہ عمارتوں کی چھتوں پر ماہر نشانہ باز تعینات ہیں، جبکہ رینجرز کی بھاری نفری بھی تعینات ہوگی۔

جلوس کے راستوں کی فضائی نگرانی بھی کی جائے گی جبکہ کسی بھی ناخوشگوار واقعے کی صورت میں پاک فوج کو بھی الرٹ رکھا گیا ہے۔