ایم کیو ایم پاکستان کے رہنما مصطفیٰ کمال نے کہا کہ پاکستان کی معیشت آئی پی پیز کا معاملہ حل کیے بغیر صحیح نہیں ہوسکتی۔

ایم کیو ایم پاکستان کے رہنما مصطفیٰ کمال نے پریس کانفرنس کرتے ہوئے کہا کہ پاکستان کے حالات اچھے نہیں ہیں، آئی پی پیز والا معاملہ ہم نے اٹھایا ہوا ہے، توقع ہے کہ اس حوالے سے وزیراعظم سے دو تین روز میں ملاقات ہوجائے گی، جبکہ ہم آئی پی پیز کے معاملے پر سب کو ساتھ بٹھا کا معاملہ حل کرسکتے ہیں۔

مصطفیٰ کمال نے کہا کہ بارش ہونے والی ہے اور نالوں کی صفائی نہیں ہوئی ہے، نالوں کی صفائی بارش سے چار ماہ پہلے سے شروع ہوتی ہے، بارشوں میں نہیں ہوتی، بلدیاتی حکومت جس کی ہے اس کی سندھ حکومت بھی ہے۔

مصطفیٰ کمال نے کہا کہ اگر پاکستان کو بچانا ہے تو کراچی کو اسکا جائز شیئر دینا ضروری ہے، جبکہ بلدیاتی حکومت کے حوالے سے ہماری ترمیم پر عملدرآمد نہیں ہوگا پاکستان ترقی نہیں کرسکتا، ہماری بات مانیں تمام اداروں اور حکومت سے درخواست ہے۔

مصطفیٰ کمال نے یہ بھی کہا کہ میں سمجھتا ہوں ملک کے مایوسی کے دلدل میں ہم نے پاکستانیوں کو امید کی کرن دی ہے، ہمیں دنیا سے کنیکٹ ہونا ہے، اگر کوٹا سسٹم ختم نہیں ہورہا تو ہم اس طرح سے کمائیں۔

مصطفیٰ کمال نے کہا کہ یکم اگست سے ایم کیو ایم پاکستان ملک گیر گرین پاکستان مہم کا آغاز کراچی سے کرنے جارہی ہے، ہر انسان کو آٹھ درخت اپنی زندگی میں لگانے ہیں، تمام شعبوں سے تعلق رکھنے والوں سے کہتا ہوں کہ اپنے علاقوں میں پودے لگانے شروع کریں، پودے لگانے سے پہلے یہ جان لیں کہ آپ جہاں پودے لگا رہے ہیں وہاں اس زمین پر کون سا پودا لگ سکتا ہے۔