سیکرٹری خارجہ محمد سائرس سجاد قاضی نے 27 جولائی کو لائو پیپلز ڈیموکریٹک ریپبلک میں منعقد ہونے والے 31 ویں آسیان ریجنل فورم کے وزارتی اجلاس میں شرت کی۔

ترجمان دفتر خارجہ ممتاز زہرہ بلوچ کے مطابق 31 واں آسیان ریجنل فورم لاؤس کے دارالحکومت وی این ٹیان میں منعقد ہوا، جس میں سیکرٹری خارجہ نے اجلاس کے دوران علاقائی امن سلامتی اور تعاون کے حوالے سے پاکستان کی بھرپور وابستگی کا اظہار کیا۔

 ترجمان دفتر خارجہ کے مطابق سیکرٹری خارجہ نے علاقائی روابط اور ترقی اور خوشحالی کے لیے آسیان کے کردار کو بھی سراہا، اور ایشیا بحر الکاہل کے خطے میں علاقائی تنازعات کے پس منظر میں پاکستان کا موقف پیش کیا۔

 سیکرٹری خارجہ کی جانب سے مقبوضہ جموں کشمیر کی صورتحال کو بھی اجاگر کیا گیا ، اس کے علاوہ انہوں نے مسئلہ کشمیر کو سلامتی کونسل کی قراردادوں اور کشمیری عوام کی امنگوں کے مطابق حل کرنے کی ضرورت پر زور دیا۔

سیکرٹری خارجہ سائرس سجاد قاضی نے غزہ اور افغانستان کی صورتحال کے حوالے سے پاکستان کا موقف بھی پیش کیا۔

ترجمان دفتر خارجہ نے بتایا کہ آسیان ریجنل فورم کی سائیڈ لائنز پر سیکرٹری خارجہ کی چین کے نائب وزیر خارجہ اور ملائشیا کی وزارت خارجہ کے سیکرٹری جنرل سے بھی ملاقاتیں ہوئی۔