امیر جماعت اسلامی حافظ نعیم الرحمان نے کہا ہے کہ سندھ میں تعلیم کا بجٹ بھی دوسرے کاموں پر لگتا ہے۔

حافظ نعیم الرحمان نے دھرنے سے خطاب کرتے ہوئے کہا کہ لوگ یہ سمجھ رہے تھے کے اب اِس ظلم کے خلاف کوئی نھیں اٹھے گا، کسی اعلیٰ افسر کی شادی ہوتی ہے تو شرکاء سے زیادہ پروٹوکول ہوتا ہے، پولیس کی زیادہ تر نفری ایسے ہی استعمال ہوتی ہے۔

انہوں نے کہا کہ لاء اینڈ آرڈر کی صورت حال خراب ہے، اِن بڑے بڑے افسران کو پیٹرول بھی ملتا ہے ان کے بچے بڑے اسکولوں میں پڑھتے ہیں جن کی فیس ڈالر میں ہوتی ہے۔

ان کا کہنا تھا کہ اور ہمارے بچے سرکاری اسکولوں میں پڑھتے ہیں جن کی حالت زار سب کے سامنے ہے، سندھ میں تعلیم کا بجٹ بھی دوسرے کاموں پر لگتا ہے۔

حافظ نعیم الرحمان نے کہا کہ آئی پی پیز کے حوالے سے سب کہتے ہیں کے اِن پر پابندی لگاؤ، حکومت کے لوگ آپ کو اِس معاملے میں مطمئن کرتے نظر آئیں گے۔

امیر جماعت اسلامی کا کہنا تھا کہ ملک میں تعلیم کا بُرا حال ہے، صرف چند فیصد لوگ ہی یونیورسٹی تک جاتے ہیں، معیاری تعلیم ہمارے بچوں کا حق ہے اور یہ حق ہم لے کر رہیں گے۔

انہوں نے کہا کہ عوام کے ذریعے ریاست بنتی ہے عوام کے بغیر حکومت نہیں بنتی، ہم حق کی بات کریں گے اور ڈنکے کی چوٹ پر کریں گے، پورا ہمارا کے پی بلوچستان امن مانگ رہا ہے کراچی کے حالات خراب ہیں، سندھ میں ڈاکوؤں کا راج ہے جن کے پاس جدید اسلحہ ہے، ہم اللّٰہ کے اور اور اس کے رسول کے ماننے والے ہیں ہم کسی سے ڈرنے والے نہیں۔

ان کا کہنا تھا کہ میں آپ سب کو خراج تحسین پیش کرتا ہوں، یہ سمجھے تھے کے ہم آئیں گے اور چند دن بیٹھ کر چلے جائیں گے، ہم چلے جائیں گے بس بجلی کے بلوں کو سستا کر دو۔

حافظ نعیم الرحمان نے کہا کہ وزیر اعظم صاحب ہم آپ سے کہتے ہیں کے آپ سنجیدگی سے سوچیں یہ سب آپ کو کرنا ہو گا۔

امیر جماعت اسلامی کا کہنا تھا کہ آج خواتین کو نہیں بلایا تھا لیکن آج خواتین کی بڑی تعداد یہاں موجود ہے، آج کراچی میں بھی دھرنا شروع ہو گیا ہے، کل کراچی میں جلسہ ہونے جارہا ہے، لاہور میں بھی دھرنا ہو گا ہم ہڑتال کی طرف بھی جائیں گے، ہم بجلی کے بل نہ بھرنے کی مہم بھی چلائیں گے۔

انہوں نے کہا کہ ہمیں کراچی سے تاجروں کے فون آرہے ہیں، ہمیں ہمارا دین اجازت دیتا ہے کہ ہم اپنے حق کے لیے نکلیں، دین ریاست کا نام ہے اور ہمیں فخر ہے، جماعت اسلامی درس و تدریس کا کام کرتی ہے، تعلیم کا کام کرتی ہے، لیکن اس کا مطلب یہ نہیں ہے کہ ہم سیاست نہیں کرتے۔

ان کا کہنا تھا کہ حکومت کو کہتا ہوں آؤ ہمارے ساتھ اسٹیج پر مزاکرات کرو، آؤ اور بتاؤ کے کیوں تم اپنی مراعات ختم نہیں کرتے کیوں تم آئی پی پیز پر پابندی نہیں لگاتے؟ اگر نہیں آو گے تو یہ دھرنا جاری رہے گا چاہے مہینہ لگے یا سال۔