اسلام آباد: وزیر اعظم شہباز شریف کی زیر صدارت وفاقی کابینہ کے اجلاس میں دہشت گردی کے حالیہ واقعات پر تشویش کا اظہار کیا گیا ہے۔

ذرائع کے مطابق وزیراعظم شہباز شریف کی زیر صدارت وفاقی کابینہ کا اجلاس ہوا جس میں وفاقی کابینہ میں ملکی معاشی و سیاسی صورت حال سمیت 6 نکاتی ایجنڈے پر غور کیا جب کہ وفاقی کابینہ نے دہشت گردی کے حالیہ واقعات پر تشویش کا اظہار کرتے ہوئے عزم استحکام آپریشن کے لیے 20 ارب روپے فراہم کرنے کے اقتصادی رابطہ کمیٹی کے فیصلے کی توثیق کردی۔

ذرائع کا کہنا ہے کہ وفاقی حکومت نے دہشت گردی سے نمٹنے کے لئے ہر ممکن تعاون کے عزم کا اعادہ کیا، وفاقی کابینہ نے سیکیورٹی فورسز کے جوانوں کی بہادری اور قربانیوں پر خراج تحسین پیش کیا۔

ذرائع کا کہنا تھا کہ وفاقی کابینہ نے شدت پسندی کے خاتمے کے لئے ضرورت پڑنے پر درکار اضافی فنڈز کی بھی منظوری دی جب کہ کابینہ کو پی ڈبلیو ڈی کے اسٹاف اور پی ایس ڈی پی منصوبوں کی منتقلی کے امور پر بریفنگ دی گئی۔

ذرائع نے مزید بتایا کہ کابینہ اجلاس میں بیرون ملک کنونشن ریکوری آف میٹیننس سے متعلق ایجنڈا آئٹم کا بھی جائزہ لیا گیا، کابینہ کمیٹی برائے قانون سازی کے 23 اگست کے اجلاس کے فیصلوں کی توثیق کی گئی۔

ذرائع نے کہا کہ اقتصادی رابطہ کمیٹی کے 22 اگست کے اجلاس کے فیصلوں کی توثیق بھی کر دی گئی ہے، وفاقی کابینہ میں ایل ڈی آئی کی پی ٹی اے کو واجب الادا رقم کا معاملہ بھی زیر غور لایا گیا جب کہ پی ٹی اے اور وزارت آئی ٹی و ٹیلی کام معاملے پر بھی تفصیلی بریفنگ دی گئی۔