اسلام آباد: اپوزیشن کی تمام جماعتوں کے اجلاس کی اندرونی کہانی سامنے آگئی ہے۔

ذرائع کے مطابق اپوزیشن کی تمام جماعتوں نے آئین پر عملدرآمد صاف شفاف منصفانہ انتخابات کی بات پر زور دیا جبکہ جے یو آئی امیر مولانا فضل الرحمان نے 3 اہم معاملات پر گفتگو کرنے پر زور دیا۔

ذرائع نے بتایا ہے کہ اجلاس کے دوران مولانا فضل الرحمان نے گفتگو کرتے کرتے ہوئے کہا کہ مذہب، معیشت اور جمہوریت پر بات کرنی چاہیے، کیا ہمارا معاشی نظام مذہب کے مطابق ہے، جمہوری نظام کمزور ہوا اسے مضبوط کرنا ہوگا۔

ذرائع کا کہنا ہے کہ عشائیہ کے میزبان محمد علی درانی نے ممکنہ اپوزیشن اتحاد کی قیادت مولانا فضل الرحمان کو کرنے کی تجویز دی اور کہا کہ ہمارے دوست بانی پی ٹی آئی نا حق قید ہیں، بانی پی ٹی آئی کی رہائی کےلئے ہمیں تحریک چلانا ہوگی۔

اس کے علاوہ پی ٹی آئی کے چیئرمین بیرسٹر گوہر نے اپوزیشن الائنس کو جلد تشکیل دینے کی بات کی اور کہا کہ ہمیں روزانہ کی بنیاد پر کام کرکے الائنس تشکیل دینا چاہیے۔

اس موقع پر محمود اچکزئی کا کہنا تھا کہ تمام مسائل کا حل آئین پر عملدرآمد ہے۔

ذرائع نے مزید بتایا کہ اجلاس میں شریک تمام جماعتوں نے مشترکہ الائنس سے متعلق مشاورت جاری رکھنے پر اتفاق کیا، تاہم آئندہ اجلاس میں تمام جماعتیں اتحاد سے متعلق تجاویز دیں گی۔