اسلام آباد: صدر مملکت آصف علی زرداری نے چین کے ساتھ کھڑے ہونے کے پاکستان کے عزم کا اعادہ کیا ہے۔

صدر مملکت آصف علی زرداری سے پیپلز لبریشن آرمی کی زمینی افواج کے کمانڈر جنرل لی چیاؤ منگ نے ملاقات کی، اس موقع پر صدر مملکت نے چین کے ساتھ کھڑے ہونے کے پاکستان کے عزم کا اعادہ کیا۔

صدر آصف علی زرداری کا کہنا ہے کہ چین پاکستان کا قابل اعتماد اور عظیم دوست ہے، دونوں ممالک کے باہمی مفاد میں اسٹریٹجک تعاون مزید مضبوط کرنے کی ضرورت ہے جب کہ دونوں ممالک کے درمیان سات دہائیوں پر محیط تاریخی تعلقات ہیں۔

صدر مملکت نے دونوں ممالک کو مزید قریب لانے کے لئے فوجی اور دفاعی تعاون سمیت عوامی اور ثقافتی روابط مزید بڑھانے کی ضرورت پر زور دیا۔

صدر مملکت نے کہا کہ پاکستان چینی زبان سیکھنے کی حوصلہ افزائی کررہا ہے، چینی زبان سیکھنے سے عوامی تعلقات کو فروغ دینے میں مدد ملے گی۔

آصف زرداری کہتے ہیں کہ اپنے گزشتہ دورِ صدارت میں پاک چین اقتصادی راہداری کا وژن پیش کیا لیکن پاکستان اور چین کے دشمن نہیں چاہتے کہ دوطرفہ تعلقات پروان چڑھیں، پاکستان اور چین کو مشترکہ چیلنجز پر قابو پانے کے لیے مل کر کام کرنا چاہیے۔

کمانڈر لی چیاؤ منگ نے کہا کہ دونوں ممالک کو دہشت گردی کے خلاف مل کر کام کرنے کی ضرورت ہے۔

کمانڈر لی چیاؤ منگ نے پاکستان میں گزشتہ روز ہونے والے دہشت گردانہ حملوں کی بھی مذمت کی، کمانڈر نے جانی نقصان پر پاکستان کی حکومت اور عوام سے دلی تعزیت کا اظہار کیا۔

قبل ازیں صدر آصف علی زرداری نے پاکستان اور چین کے درمیان دفاعی تعاون بڑھانے کے لیے خدمات کے اعتراف میں جنرل لی چیاؤمنگ کو نشان امتیاز (ملٹری) کا اعزاز دیا۔ چینی کمانڈر نے نشان امتیاز (ملٹری) سے نوازنے پر صدر مملکت کا شکریہ ادا کیا۔