اسلام آباد: پاکستان اور جرمنی کی جانب سے دوطرفہ تعلقات کو مزید مضبوط بنانے کے عزم کا اعادہ کیا گیا ہے۔

 وزیر اعظم محمد شہباز شریف سے جرمنی کی وفاقی وزیر برائے اقتصادی تعاون و ترقی محترمہ سوینجا شولزے سے وزیرِ اعظم ہاؤس اسلام آباد میں ملاقات ہوئی جس میں دوطرفہ اقتصادی تعاون کو مزید بڑھانے کے لائحہ عمل پر تبادلہ خیال کیا گیا۔

اس کے علاوہ ملاقات میں غزہ کی صورتحال اور یوکرین تنازع سمیت علاقائی اور عالمی مسائل پر بھی تبادلہ خیال ہوا۔

ملاقات کے دوران وزیراعظم نے وفاقی وزیر شلزے کا پاکستان میں خیرمقدم کیا اور پاکستان کی سماجی و اقتصادی ترقی کے لیے جرمنی کے تعاون کو سراہتے ہوئے کہا کہ پاکستان اور جرمنی کے مابین باہمی طور پر مفید تجارتی اور اقتصادی تعلقات موجود ہیں۔

شہباز شریف نے پاکستان کی صنعتی ترقی میں جرمنی کے کردار کی تعریف بھی کی اور پاکستان جرمنی شراکت داری کو فروغ دینے کی بھرپور خواہش کا بھی اظہار کیا۔

اس تناظر میں وزیراعظم نے پائیدار ترقی، موسمیاتی تبدیلی کے مضر اثرت میں کمی اور معاشی نمو کے لیے پاکستان کے عزم کو اجاگر کیا جبکہ ملک کی معاشی بحالی کے لیے اصلاحات سمیت اپنی حکومت کی ترجیحات کا بھی ذکر کیا۔

دوسری جانب وزیر شلزے نے وزیر اعظم کو چانسلر اولاف شولز کا تہنیتی پیغام پہنچایا اور پاکستان کے ساتھ دوطرفہ تعلقات بالخصوص تجارت، سرمایہ کاری اور ترقیاتی تعاون کے شعبوں میں اشتراک مضبوط بنانے کے لیے جرمنی کے عزم کا اعادہ کیا۔

 انہوں نے مزید کہا کہ جرمنی پاکستان کے قابل تجدید توانائی کے شعبے اور موسمیاتی تبدیلی سے بچاؤ کے اقدامات کے لیے اپنا تعاون بڑھانے کا خواہاں ہے۔

اس موقع پر وفاقی وزیر سوینجا شلزے نے چانسلر اولاف شولز کی جانب سے وزیر اعظم کو اکتوبر میں ہیمبرگ پائیداری کانفرنس میں شرکت کی دعوت بھی دی۔

 واضح رہے کہ ملاقات میں دونوں طرف کے سینئر حکام نے شرکت کی جن میں نائب وزیر اعظم اور وزیر خارجہ، وزیر برائے منصوبہ بندی، وزیر برائے اقتصادی امور، وزیر تجارت اور وزیر مملکت برائے آئی ٹی شامل تھے ۔