کراچی: شہر قائد میں طوفان اسنیٰ کا خطرہ ٹلتے ہی خلیج بنگال میں دوسرا سسٹم بننے لگا ہے۔

محکمہ موسمیات کے انجم نذیر کے مطابق خلیج بنگال میں ہوا کا کم دباؤ شدت اختیار کرتے ہوئے ڈپریشن میں تبدیل ہوگیا ہے، تین تا چار روز میں اس کے اثرات بھارتی گجرات پر اثرانداز ہوں گے۔

انجم نذیر نے بتایا کہ ڈپریشن کے اثرات پاکستان کی ساحلی پٹی پر ہوں گے یا نہیں، یہ کہنا قبل از وقت ہے تاہم 3 تا 4 روز بعد اس کی پیش گوئی کی جاسکے گی۔

خیال رہے کہ کراچی میں طوفان اسنیٰ کا خطرہ ٹل گیا ہے جب کہ بحیرہ عرب کےشمال مشرق میں موجود سمندری طوفان کا فاصلہ مذید بڑھ کر230 کلومیٹر ہوگیا ہے۔

اس حوالے سے محکمہ موسمیات کا کہنا ہے کہ سمندری طوفان کا فاصلہ بلوچستان کے ساحلی مقام اورماڑہ سے 180 کلومیٹر اور گوادرسے 300 کلومیٹر کے لگ بھگ ہے۔

محکمہ موسمیات نے کہا کہ گذشتہ 6 گھنٹوں کے دوران طوفان مزید مغرب کی جانب بڑھا ہے اور یہ مزید مغرب اور جنوب مغرب کی جانب بڑھے گا۔

انہوں نے بتایا کہ جنوبی اور مغربی سندھ میں مون سون کی معتدل ہوائیں داخل ہورہی ہیں جس کی وجہ سے کراچی میں آج مطلع ابرآلود رہنے اور تیزہواؤں کے ساتھ بارش کا امکان ہے جب کہ شہر کے چند مقامات پرموسلادھاربارشیں ہوسکتی ہیں۔