اسلام آباد: مشیر اطلاعات خیبر پختونخوا بیرسٹر سیف نے کہا ہے کہ ہم گارنٹی دیتے ہیں کہ اسلام آباد میں جلسے سے امن وامان کا کوئی مسئلہ نہیں ہوگا۔

بیرسٹر سیف نے اسلام آباد میں پریس کانفرنس کرتے ہوئے کہا کہ 22 اگست کو پی ٹی آئی اسلام آباد میں جلسہ کرے گی، بانی پی ٹی آئی سے مشاورت کے بعد جلسے کی تاریخ کا اعلان کیا، کے پی کے سے بہت بڑے قافلے جلسے میں شرکت کریں گے۔

انہوں نے کہا کہ بانی پی ٹی آئی کی ہدایت ہے قانون کے خلاف کوئی کام نہ کریں، غیر قانونی طور پر جلسہ کرنے کی کوشش نہیں کی، خدشہ ہے ضلعی انتظامیہ اجازت نہ دے، ضلعی انتظامیہ سے کہتا ہو جلسے کی اجازت دینا ہمارا آئینی حق ہے۔

مشیر اطلاعات کا کہنا تھا کہ ہم گارینٹی دیتے ہیں اسلام آباد میں جلسے سے امن کا کوئی مسئلہ نہیں ہوگا، جلسہ پر امن ہوگا، ایسی صورتحال نہ پیدا کی جائے کہ تلخی میں اضافہ ہوا۔

بیرسٹر سیف نے کہا کہ پاکستان مشکل دور سے گزر رہا ہے، کچھ لوگوں نے بانی پی ٹی آئی سے ملاقات میں کرپشن کا کہا، شکایت کی گئی کے پی کے بعض محکموں میں کرپشن ہورہی ہے۔

انہوں نے کہا کہ بانی پی ٹی آئی نے پریس کانفرنس کر کے وزراء کو پیغام دینے کا کہا، انہوں نے کہا کرپشن کے خلاف زیروٹالرنس پالیسی ہوگی۔

مشیر اطلاعات نے مزید کہا کہ شکیل خان نے اسی تناظر میں پریس کانفرنس، تحفظات کا اظہار کیا، کمیٹی کے لیے شاہ فرمان، قاضی انور، مصدق عباسی کا نام لیا گیا، کمیٹی کی تحقیقات کے بعد مزید کارروائی کرنے کا فیصلہ کیاگیا، 2 ہفتے کارروائی ہوئی، متعدد لوگوں کے بیانات لیے گئے، کمیٹی نے تجاویز مرتب کر کے وزیراعلیٰ کو پیش کردیں۔