کراچی: وزیر اعلیٰ سندھ سید مراد علی شاہ نے میئر کراچی کی تعریف کرتے ہوئے کہا کہ مرتضیٰ وہاب رات کو جاگتے ہیں اور ہم چین سے سوتے ہیں۔

وزیراعلیٰ سندھ سید مراد علی شاہ کراچی کے ہنگامی دورے پر روانہ ہوئے جب کہ ان کے ہمراہ وزیر بلدیات سندھ سعید غنی اور میئر کراچی مرتضیٰ وہاب موجود تھے۔

وزیراعلیٰ سندھ نے سی پی ایس پمپنگ اسٹیشن کا دورہ کیا جب کہ انہوں نے پمپنگ اسٹیشن کی نکاسی کا بھی جائزہ لیا۔

ترجمان کے مطابق بریفنگ میں انہیں بتایا گیا کہ سی پی ایس پمپنگ کو پی آئی ڈی سی پمپنگ اسٹیشن بھی کہتے ہیں، سی پی ایس شہر کے نکاسی آب کا پانی پمپ کے ذریعے سمندر برد کرتی ہے۔

علاوہ ازیں وزیراعلیٰ سندھ نے آئی آئی چند ریگر روڈ کا معائنہ کیا، جہاں انہوں نے صفائی ستھرائی اور بارش کے پانی کی نکاسی کا جائزہ لیا، وزیراعلیٰ نے ٹاور کے علاقے کا دورہ کیا۔

میئر کراچی نے وزیراعلیٰ کو آگاہ کیا کہ کل رات سے پمپنگ مشینوں سے پانی کی نکاسی کی ہے، اب ٹاور کا علاقہ بالکل صاف ہے۔

وزیراعلیٰ سندھ مراد علی شاہ نے میئر کراچی مرتضیٰ وہاب کی تعریف کرتے ہوئے کہا کہ مرتضیٰ وہاب رات کو جاگتے ہیں اور ہم چین سے سوتے ہیں، آج میں نے بھی سوچا کہ ہم بھی جاگ کر شہر کو دیکھتے ہیں۔

وزیراعلیٰ سندھ کا کہنا ہے کہ 2022 کی بارشوں میں شہر کے نکاسی سسٹم نے بہتر پرفارم کیا، اب 2024 کی بارشیں وقفے وقفے سے جاری ہیں اور بلدیاتی اداروں کے ورکرز نے دن رات کام کیا ہے جن کی محنت کے باعث شہر بہتر صورت حال میں ہے۔

ان کا کہنا تھا کہ ابھی بھی الرٹ ہیں اور ہماری تیاری مکمل ہے، گزشتہ ایک ہفتے سے ساؤتھ۔ ایسٹرن اضلاع میں ایوریج سے زیادہ بارش ہوئی ہے، کافی اضلاع اور شہروں کے نشیبی علاقے زیر آب آگئے ہیں، ہم نے وزیراعلیٰ ہاؤس میں رین ایمرجنسی سیل قائم کیا ہے۔

مراد علی شاہ کہتے ہیں کہ عوام کے مسائل حل کررہے ہیں، اس سے پہلے میں رائٹ بینک کے مسائل دیکھ کر آیا تھا، سیلاب متاثرین کے گھر دیکھے اور وہ بہت خوش تھے جب کہ میں ٹنڈو محمد خان میں بھی سیلاب متاثرین سے مل کر آیا ہوں، وہ مجھے اپنے گھر لے گئے اور پرسکون ہیں۔

وزیراعلیٰ نے بتایا کہ نئے تعمیر شدہ مکانات میں رہنے والوں نے چیئرمین بلاول بھٹو کا شکریہ ادا کیا ہے، بلوچستان میں بارشوں کے باعث پانی نیچے آیا ہے جب کہ منچھر جھیل میں 115 فٹ پانی موجود ہے، منچھر جھیل سے پانی دریا میں نکل جائے گا۔

انہوں نے مزید بتایا کہ ہمیں ماحولیاتی تبدیلیوں کے مسائل کی وجہ سے بارشیں اور سیلاب کا سامنا ہے ، ہم نئے جنگلات لگانے کے منصوبے پر بھی کام کررہے ہیں جب کہ ہم گزشتہ 16 برس سے حکومت میں ہیں اور اگلے 16 برس بھی حکومت کریں گے۔

انہوں نے کہا شہر میں نالے اور فٹ پاتھ بھی الاٹ ہوگئے ہیں، اب کسی حد تک ہم نے شہر کا سسٹم ٹھیک کیا ہے، حیدرآباد میں پانی کی نکاسی پمپوں کے ذریعے ہوتی ہے لیکن بجلی نہ ہونے کے باعث پمپنگ اسٹیشن صحیح کام نہیں کررہے۔

وزیراعلیٰ سندھ مزید کہتے ہیں کہ آج وفاقی وزیر توانائی سے اجلاس ہوا ہے، اجلاس میں بجلی قلت کا سبب چوری بتایا گیا ہے جتنی بجلی پیدا ہورہی ہے سندھ کو اس کا 25 فیصد تو دیا جائے تاہم حیسکو اور سیپکو کی کارکردگی بہتر کرنے کی ضرورت ہے۔