حکومت سندھ نے کراچی شہر سے بس اڈوں کو باہر منتقل کرنے اور مسافروں کو مفت شٹل سروس دینے کا بڑا فیصلہ کیا ہے۔

سندھ کے سینئر وزیر شرجیل انعام میمن کی زیر صدارت اعلیٰ سطح اجلاس ہوا جس میں حکومت سندھ کی جانب سے بس اڈوں کو ترجیحی بنیادوں پر فوری طور شہر سے باہر منتقل کرنے کی ہدایات دی گئی۔

شرجیل انعام میمن نے اجلاس کے دوران کہا کہ مسافروں کے لئے پرانے بس اڈوں سے ٹرمینل تک پہنچانے کے لئے مفت شٹل سروس 14 اگست سے شروع کی جارہی ہے۔

 شرجیل انعام میمن نے کہا کہ ہیوی گاڑیوں کی وجہ سے کراچی کی شہریوں کو تکالیف کا سامنا کرنا پڑتا ہے، سڑکوں پر بھی دباؤ بڑھتا ہے، اسی لیے تمام بس اڈوں کو کراچی شہر سے باہرمنتقل کیا جارہا ہے، کراچی بس ٹرمینل میں مسافروں کے لئے مزید جدید سہولیات فراہم کی جا رہی ہیں۔

شرجیل انعام میمن نے کہا کہ شٹل سروس کینٹ اسٹیشن، صغیر شہید روڈ، ایم اے جناح روڈ اور الکرم اسکوائر سے شروع کی جارہی ہے، جس کے ذریعے مسافرپرانے بس اڈوں سے ٹرمینل تک مفت سفر کر سکیں گے۔

 شرجیل انعام میمن نے اجلاس میں ہدایت دیتے ہوئے کہا کہ کوشش کی جائے کہ کراچی کے شہریوں اورمسافروں کو کسی بھی قسم کی تکلیف یا پریشانی کا سامنا نہ کرنا پڑے، اس کے علاوہ تمام اسٹیک ہولڈرز کی مفادات کا خیال رکھتے ہوئے اقدامات اٹھائے جائیں، ایسے اقدامات کو یقینی بنایا جائے کہ ٹرانسپورٹرز کو بھی نقصان نہ ہو اور مسافروں کو بھی ریلیف مل سکے۔

  شرجیل انعام میمن نے کہا کہ مسافروں کا تحفظ یقینی بنانے کے لئے کراچی بس ٹرمینل پر پولیس کی چیک پوسٹ بھی بنائی جا رہی ہے۔

واضح رہے کہ اجلاس میں سیکریٹری ٹرانسپورٹ اسد ضامن، کمشنر کراچی حسن نقوی، کراچی پولیس چیف جاوید عالم اوڈھو، ڈی آئی جی ٹریفک احمد نواز چیمہ اور دیگرشریک تھے۔