کراچی: قائد حزب اختلاف علی خورشیدی کا کہنا ہے کہ پیپلز پارٹی کی سندھ حکومت کی داستانِ کرپشن سندھ کا بچہ بچہ جانتا ہے۔

سندھ اسمبلی میں قائد حزب اختلاف علی خورشیدی کا ناصر حسین شاہ کے بیان پر ردِ عمل دیتے ہوئے کہنا تھا کہ دنیا میں ڈویلپمنٹ ہوتی ہے تو کرپشن ہوتی ہے لیکن سندھ میں کرپشن کرنا ہو تو ڈویلپمنٹ ہوتی ہے۔

انہوں نے کہا کہ پیپلز پارٹی کی سندھ حکومت کی داستانِ کرپشن سندھ کا بچہ بچہ جانتا ہے جب کہ پیپلزپارٹی کی سندھ حکومت نے سندھ میں کرپشن کو صنعت کا درجہ دے دیا ہے۔

علی خورشیدی کا کہنا تھا کہ ہر سال قومی اور بین الاقوامی اداروں کی جانب سے کرپشن پر جاری رپورٹس میں علی بابا چالیس چوروں کی ساری کہانیاں لکھی ہوتی ہیں۔

انہوں نے سوال اٹھایا کہ ناصر حسین شاہ بتائیں کہ سندھ حکومت نے پچھلے 15 سالوں میں کراچی کے کتنے نوجوانوں کو نوکریاں دیں، سندھ حکومت پاکستان کے بجٹ میں 70 فیصد حصہ ڈالنے والے کراچی پر سالانہ کتنا پیسہ خرچ کرتی ہے؟۔

قائد حزب اختلاف کہتے ہیں کہ کراچی کے سپتال، سڑکیں، پارکس اور اسکول ورلڈ بینک کے قرضوں سے بنتے ہیں جسے کراچی کے شہریوں نے ادا کرنا ہے۔

علی خورشیدی نے کہا کہ سندھ حکومت کی کرپشن کی گواہ سندھ کا تباہ حال انفراسٹرکچر، صحت اور تعلیم کا نظام ہے۔

ان کا مزید کہنا تھا کہ پیپلزپارٹی کی متعصب سندھ حکومت کراچی سمیت دیگر شہروں کو پانی، سیوریج، تعلیم اور نوکری نہیں دیتی، پیپلزپارٹی کے وزیروں اور وڈیروں کو ایم کیو ایم کے خلاف سوچ سمجھ کر بیان دینا چاہیے۔