پشاور: وزیراعلیٰ خیبرپختونخوا علی امین گنڈاپور کے مخالف دھڑے کا اسلام آباد میں اہم اجلاس منعقد۔

ذرائع کے مطابق وزیراعلیٰ خیبرپختونخوا علی امین گنڈاپور کے مخالف دھڑے کا اسلام آباد میں اہم اجلاس ہوا جس میں خیبر پختونخوا حکومت میں مختلف نوعیت کی بدعنوانیوں پر اظہار تشویش کیا گیا۔

ذرائع کا کہنا ہے کہ اجلاس میں وزیراعلیٰ کے اعلانات کے باوجود بانی پی ٹی آئی کی رہائی کے لئے جلسے نہ کرنے پر بھی اظہار تشویش کیا گیا ہے جب کہ اجلاس میں شریک پارٹی رہنماؤں نے بانی پی ٹی آئی کے حق میں بٹ خیلہ سے جلسوں کا آغاز کرنے کا فیصلہ کیا ہے۔

ذرائع نے بتایا کہ بانی پی ٹی آئی کے حق میں مردان میں دوسرا جلسہ ہوگا، صوبائی دارالحکومت میں پارٹی کارکنان بانی پی ٹی آئی کے لئے بڑا جلسہ کریں گے۔

ذرائع کا مزید کہنا تھا کہ بانی پی ٹی آئی کی جانب سے پارٹی عہدے بھی تبدیل کرنے پر غور کیا جارہا ہے، بانی پی ٹی آئی ناراض ارکین سمیت وفاقی اور صوبائی سطح پر پارٹی عہدے پر نظرثانی کریں گے۔

دوسری جانب صوبائی صدر و وزیراعلیٰ خیبرپختونخوا علی امین گنڈاپور کا کہنا ہے کہ ایسی کوئی بات نہیں اور نہ ہی مجھے ایسی کوئی تجاویز دی گئیں ہیں۔

علی امین گنڈاپور نے کہا کہ صوبائی سمیت مرکزی سطح پر کوئی احتلافات نہیں ہیں، جلسہ کیوں ملتوی ہوا سب کو معلوم ہے، صوبے میں حکومت مضبوط اور مکمل حمایت حاصل ہے۔

وزیر اعلیٰ خیبرپختونخوا مزید کہتے ہیں کہ یہ سب افواہیں اس لیے پھیلائی جارہی ہیں کہ پارٹی اور حکومت کو کمزور کیا جاسکے، پارٹی کارکن اور قائدین متحد اور ایک پیج پر ہیں جس کا اندازہ آٹھ ستمبر کو لگ جائے گا۔