وزیراعلیٰ سندھ سید مراد علی شاہ نے کہا ہے کہ آئی ٹی کورسز کے ذریعے نوجوانوں کو روزگار فراہم کیا جائے گا۔

سید مراد علی شاہ کی زیرِ صدارت پیپلز انفارمیشن ٹیکنالوجی پروگرام (PITP) کے مفاہمت نامے (MoU) پر دستخطی تقریب ہوئی۔

اجلاس میں وزیراعلیٰ کے سیکریٹری رحیم شیخ، سیکریٹری اسکول ایجوکیشن زاہد عباسی، سیکریٹری جامعات و بورڈز عباس بلوچ اور مختلف یونیورسٹیز کے وی سیز نے شرکت کی۔

ایم او یو سندھ حکومت کے محکمہ آئی ٹی اور سندھ کی تین بڑی جامعات کے درمیان ہوا، تین بڑی جامعات میں این ای ڈی یونیورسٹی ، مہران یونیورسٹی اور آئی بی اے سکھر شامل ہیں۔

وزیراعلیٰ سندھ کی موجودگی میں سندھ حکومت کی جانب سے سیکریٹری انفارمیشن ٹیکنالوجی نور احمد سموں نے معاہدے پر دستخط کئے۔

اس موقع پر وزیراعلیٰ سندھ سید مراد علی شاہ کا کہنا تھا کہ پروگرام کا مقصد سندھ کے طلباء کی آئی ٹی مہارتوں کو بڑھانا اور سندھ میں غربت میں کمی لانا ہے، پروگرام کے تحت ملازمت کیلئے صنعت کی طرف سے تسلیم شدہ سرٹیفیکیشن فراہم کئے جائیں گے۔

انہوں نے کہا کہ محکمہ آئی ٹی یہ فنڈز متعلقہ یونیورسٹیوں کو اسائنمنٹ اکاؤنٹس میں فراہم کرے گا۔

سیکریٹری آئی ٹی نور احمد سموں نے کہا کہ پروگرام ابتدائی طور پر 10 ہزار نوجوانوں کیلئے ڈیزائن کیا گیا ہے۔

وزیراعلیٰ سندھ نے آئی ٹی کورسز کروانے کیلئے 500 ملین روپے کی منظوری دے دی۔

سیکریٹری آئی ٹی نور احمد سموں نے بتایا کہ آئی ٹی پروگرامز میں جاوا ڈویلپر، پائتھون ڈیولپر، ڈیٹا بیس ایڈمنسٹریٹر، گرافک ڈیزائنر، ای کامرس پروفیشنل، ڈجیٹل مارکیٹنگ پروفیشنل، ویب ڈویلپر، موبائل ایپلیکیشن ڈیولپر اور ڈیٹا سائنسدان کے سرٹیفیکیشن شامل ہیں۔

سید مراد علی شاہ کا مزید کہا کہ دس ہزار طلباء کیلئے ہر ایک سرٹیفیکیشن کی مدت دو  ماہ ہوگی، ہفتہ کے پانچ دن اور روزانہ تین گھنٹے تربیت دی جائے گی۔