اسلام آباد: وفاقی وزیرپٹرولیم مصدق ملک نے بانی پی ٹی آئی کو مخاطب کرتے ہوئے کہا کہ اگر مگر مت کریں، معافی مانگنی ہے تو مانگیں۔

وفاقی وزیر پٹرولیم مصدق ملک کا نیوز کانفرنس کرتے ہوئے کہنا تھا کہ ہم سب اکٹھے ہیں، اس ملک کو کچھ نہیں ہوگا، ہمارے ملک کے مستقبل کے ساتھ مت کھیلیں۔ 9 مئی کو شہدا کی یادگاروں کی بے حرمتی کی گئی، اگرمگر مت کریں، معافی مانگنی ہے تو مانگیں۔

مصدق ملک کا کہنا ہے کہ ہم سب مل کر ملک کوخوشحالی کی جانب لے کر جارہے ہیں، عوام نے آپ کو ووٹ اسمبلی میں انتشار پھیلانے کے لیے نہیں دیا۔ پاکستان میں ترقی کی شرح بڑھ گئی ہے جب کہ مہنگائی کی شرح میں نمایاں کمی دیکھنے میں آئی ہے۔

وفاقی وزیر کہتے ہیں کہ نوجوانوں کو گمراہ کرکے ملک کے مستقبل کو خطرے میں ڈالا جارہا ہے، سوشل میڈیا پر ملک کے خلاف منفی پروپیگنڈا کیا جارہا ہے۔ پاکستان کی منزل اقتصادی ترقی ہے، پاکستان میں ترقی کی شرح بڑھ گئی ہے۔

مصدق ملک نے مزید کہا کہ مخصوص ٹولہ عوام کے ذہنوں میں انتشار اور نفرت بھرنا چاہتا ہے۔ پاکستان اور بنگلا دیش کا موازنہ کرنے والے ملک دشمن ہیں جب کہ ایک جماعت کے کارکن مسلسل ملک کے خلاف بیانات دے رہے ہیں۔