اسلام آباد: پاکستان کرکٹ بورڈ کے چیئرمین محسن نقوی سے آئی سی سی کے وفد کی ملاقات ہوئی، اس دوران آئی سی سی چیمپئنز ٹرافی ٹورنامنٹ 2025 کی تیاریوں کے حوالے سے تفصیلی تبادلہ خیال کیا گیا۔

ملاقات میں آئی سی سی چیمپئنز ٹرافی ٹورنامنٹ کے سیکیورٹی انتظامات پر بھی بات چیت ہوئی، اس موقع پر آئی سی سی کے وفد نے کراچی اور راولپنڈی میں چیمپئنز ٹرافی کے لئے کیے انتظامات پر اطمینان کا اظہار کیا اور کراچی، راولپنڈی اور اسلام آباد کے سیکیورٹی انتظامات کو بھی تسلی بخش قرار دیا۔

چیئرمین پی سی بی محسن نقوی نے آئی سی سی چیمپئنز ٹرافی کے لئے عالمی معیار کے انتظامات کی یقین دہانی کروائی اور کہا کہ اسٹیڈیمز کی اپ گریڈیشن کا کام چیمپئنز ٹرافی سے قبل ہر صورت مکمل کر لیا جائے گا، تمام ٹیموں کے لئے فول پروف سیکیورٹی انتظامات کیے جائیں گے۔

انہوں نے کہا کہ آئی سی سی چیمپئنز ٹرافی ٹورنامنٹ کا پاکستان میں انعقاد ایک اعزاز ہے، جتنا بڑا ٹورنامنٹ ہے اس کے مطابق انتظامات کو حتمی شکل دے رہے ہیں۔

محسن نقوی نے مزید کہا کہ تمام ٹیموں کے کھلاڑی پرامن اور محفوظ ماحول میں کرکٹ کے کھیل کو انجوائے کریں گے، اپ گریڈیشن کے بعد اسٹیڈیمز میں بین الاقوامی معیار کی سہولتیں ہوں گی اور شائقین کرکٹ میچز سے زیادہ محظوظ ہوں گے، پاکستانی قوم کرکٹ کے کھیل سے محبت کرتی ہے اور تمام ٹیموں کو سپورٹ کرتے ہیں۔

واضح رہے کہ وفد میں آئی سی سی کی سینئر مینجر ایونٹس سارہ ایڈگر، ایونٹ مینجر و چیمپئنز ٹرافی ایونٹ لیڈ عون محمد زیدی، جنرل مینجر کرکٹ وسیم خان، سیکیورٹی مینجر ڈیوڈ مسکر، براڈ کاسٹ کنسلٹنٹ منصور منج شامل تھے۔

علاوہ ازیں پاکستان کرکٹ بورڈ کے ڈائریکٹر انٹرنیشنل کرکٹ عثمان واہلہ، ڈائریکٹر سیکیورٹی کرنل ریٹائرڈ خالد محمود، ہیڈ آف مارکیٹنگ سلمان مسعود بھی اس موقع پر موجود تھے۔