اسلام آباد: صدر مملکت آصف علی زرداری اور وزیراعظم شہباز شریف نے بابائے قوم کی 76ویں برسی کے موقع پر اپنے الگ الگ پیغامات میں کہا ہے کہ قائداعظم محمد علی جناح ایک ویژنری لیڈر تھے جنہوں نے ہندوستان کے مسلمانوں کو ایک جھنڈے تلے متحد کیا۔

صدر آصف زرداری نے قائداعظم محمد علی جناح کو خراج عقیدت پیش کرتے ہوئے کہا کہ پوری قوم کو ان کی انتھک جدوجہد اور حق خودارادیت کے لیے غیر متزلزل عزم پر فخر ہے جس نے کروڑوں مسلمانوں کی تقدیر سنواری۔

انہوں نے کہا کہ ہم برصغیر کے مسلمانوں کے لیے ایک علیحدہ وطن کے قیام کے لیے ان کی کوششوں اور تعاون کے لیے ان کے انتہائی مقروض ہیں جہاں وہ عزت کے ساتھ رہ سکیں اور اپنے سیاسی، ثقافتی اور مذہبی حقوق کا استعمال کر سکیں۔

دوسری جانب وزیراعظم شہباز شریف نے بھی اپنے پیغام میں قائداعظم کو خراج عقیدت پیش کرتے ہوئے کہا کہ قائداعظم تاریخ میں نامور سیاستدان کے طور پر کھڑے ہیں۔

انہوں نے کہا کہ قائداعظم نے برصغیر کے مسلمانوں کی تحریک آزادی کی بھرپور قیادت کی اور دنیا کی پہلی اسلامی نظریاتی ریاست کا قیام عمل میں لایا۔

وزیر اعظم نے کہا کہ جمہوریت، سماجی انصاف اور مساوات کے اصولوں کے لیے ان کی غیر متزلزل وابستگی نے ایک ایسی قوم کی بنیاد رکھی جہاں ہر شہری متنوع ثقافتوں کے باوجود ترقی کی منازل طے کر سکتا ہے۔

شہباز شریف نے مزید کہا کہ جب ہم ان کی میراث کا احترام کرتے ہیں، ہم قائد کے پاکستان کے وژن کو عملی جامہ پہنانے کے لیے اپنے عزم کا اعادہ کرتے ہیں، ایک عظیم قوم کے لیے پرعزم جذبے کے ساتھ عصری چیلنجوں سے نمٹنے کے لیے۔