کراچی کے علاقے صدر میں واقع نعمان سینٹر کی بیسمنٹ میں لگی آگ پر قابو پالیا گیا ہے، عمارت میں کولنگ کا عمل جاری ہے۔

فائر بریگیڈ حکام نے بتایا ہے کہ آتشزدگی کے باعث عمارت کی بیسمنٹ میں کھڑی تین گاڑیاں، ایک رکشہ اور ایک موٹر سائیکل مکمل جل گئیں جبکہ عمارت میں دھواں موجود ہے جسے بڑے exhaust فین کی مدد سے نکالا جا رہا ہے۔

کراچی کے علاقے صدر ایمپریس مارکیٹ کے سامنے نعمان سینٹر میں آگ لگی جس کی اطلاع ملنے پر فائر بریگیڈ کا عملہ اور متعلقہ ادارے پہنچے، جہاں ریسکیو ٹیموں نے آگ بجھانے کا عمل شروع کیا۔

نعمان سینٹر میں کسی جانی نقصان یا کسی شخص کے پھنسے ہونے کی اطلاع نہیں ہے لیکن متاثرہ بلڈنگ میں سرچنگ جاری ہیں۔

پولیس کا کہنا تھا کہ روڈ کو ٹریفک کےلئے بند کردیا گیا ہے، تماشہ دیکھنے والی عوام کے رش کی وجہ سے آپریشن میں مشکلات ہیں۔

پولیس کے مطابق آگ نعمان سینٹر کے بیسمنٹ میں لگے بجلی کے میٹرز سے لگی تھی، دھواں زیادہ ہونے کے باعث فائر فائٹرز کو عمارت میں داخل ہونے پر دشواری کا سامنا تھا۔

قبل ازیں فائر بریگیڈ حکام نے بتایا تھا کہ عمارت میں داخل ہوگئے جس مقام پر آگ لگی ہے وہاں تک بھی پہنچ چکے ہیں، جلد آگ پر مکمل قابو پالیں گے، کافی حد تک کنٹرول کرلیا ہے، کے ایم سی کے 8 فائر ٹینڈرز موجود ہیں دیگر ادارے بھی کام کررہے ہیں۔

ریسکیو حکام کا کہنا تھا کہ صدر نعمان سینٹر آتشزدگی پر ریسکیو 1122 کی ٹیمیں آگ پر قابو پانے کی کوشش میں مصروف ہیں، ٹیموں میں ریسکیو اہلکاروں کے ساتھ ساتھ خواتین اہلکار بھی شامل ہیں۔