اسلام آباد: وفاقی وزیر خزانہ محمد اورنگزیب نے کہا ہے کہ ٹیکس ادا کرنا ضروری ہے اس کے بغیر ملک ترقی نہیں کرسکتا۔

وزیر خزانہ محمد اورنگزیب نے اپنے جاری کردہ بیان میں کہا کہ آئی ایم ایف کو ٹارگٹڈ سبسڈی پر اعتراض نہیں ہے، بی آئی ایس پی کے ذریعے مستحق طبقے کو سبسڈی دی جاسکتی ہے۔

انہوں نے کہا کہ رواں ہفتے وزرائے اعلیٰ سے بات چیت ہوگی، ملک بھر میں یکساں پالیسی نافذ ہوگی، وفاقی سیکریٹری خزانہ بھی صوبائی سیکریٹری سے بات چیت کریں گے، اسی مہینے صوبوں سے مل کر قومی فنانشل پیکٹ تیار کیا جائے گا۔

محمد اورنگزیب نے کہا کہ بیرونی فنانسگ کا 2 ارب کا گیپ ہے، اسے پورا کرنے کیلئے ایڈوانس سطح پر بات چیت جاری ہے، کمرشل لون کے لئے اس وقت معاہدہ ہونا ضروری ہے، قرض جاری ہونا ضرورت نہیں۔

انکا کہنا تھا کہ قرض رول اوور کے لئے بات چیت حتمی مرحلے میں ہے اور مثبت انداز میں چل رہی ہے، دوست ممالک کے متعلقہ ادارے جلد اپنی حکومتوں کو اس کے بارے میں آگاہ کریں گے۔

وفاقی وزیر نے کہا کہ ایف بی آر کا ٹیکس وصولیوں کا ہدف ڈیجیٹلائزیشن اور انفورسمنٹ سے پورا کریں گے، اس وقت ودہولڈنگ ٹیکس میں اضافے کی کوئی تجویز زیر غور نہیں۔

انہوں نے مزید کہا کہ تاجروں پرعائد ٹیکس واپس لینے کا مطلب ہے کہ ٹیکس تنخواہ دار، مینوفیکچرنگ سیکٹر سے لیا جائے، ایسا نہیں ہوسکتا، تاجروں کو ہر سہولت دیں گے، ان کے جائز مطالبات مانیں گے، سوسائٹی کے شعبے کو ٹیکس ادا کرنا ہوگا، اس کے بغیر ملک ترقی نہیں کرسکتا۔