سرگودھا: قومی اسمبلی میں اپوزیشن لیڈر عمر ایوب خان نے کہا ہے کہ بانی پی ٹی آئی کا ملٹری ٹرائل نہیں ہوگا۔

پی ٹی آئی کے عمر ایوب نے انسداد دہشت گردی کی خصوصی عدالت میں پیشی کے بعد میڈیا سے بات چیت کرتے ہوئے کہا کہ حکومت جن لوگوں کے ملٹری ٹرائل کر رہی ہے وہ سب سیاسی قیدی ہیں، تحریک انصاف 9 مئی کے واقعات میں ملوث نہیں حکومت کے پاس ویڈیو کے بارے میں کوئی ٹھوس شواہد ہیں تو وہ سامنے لائے۔

انہوں نے کہا کہ ہم نے اختر مینگل سے کہا ہے کہ وہ اپنا استعفیٰ واپس لے لیں، اختر مینگل نے کہا کہ بلوچستان آگ میں جل رہا ہے کسی کو فکر نہیں، لوگوں کی آنکھیں نکال کر انہیں عبرت کا نشان بنایا جا رہا ہے۔

پی ٹی آئی رہنما نے کہا کہ اپوزیشن جماعتیں ملک اور جمہوریت کی بقا کی جنگ لڑ رہے ہیں چینی اور گندم اسکینڈل میں براہ راست محسن نقوی ملوث ہیں۔

 عمر ایوب نے مزید کہا کہ مہنگائی اور کرپشن اپنے عروج پر ہے حکومت کا کوئی مستقبل نہیں، موجودہ حکومت کو کون چلا رہا ہے میں نام بتاؤں گا لیکن اپ اپنی ٹی وی پر چلا نہیں سکیں گے۔

واضح رہے کہ عمر ایوب، احمد خان بھچر قومی اسمبلی کے رکن احمد چٹھہ اور دیگر کے خلاف 9 مئی کو میانوالی میں ہنگامہ آرائی اور توڑ پھوڑ کے مقدمے کی سماعت جج کے تبادلے کے باعث نہ ہو سکی۔ 19 ستمبر آئندہ تاریخ مقرر کی گئی ہے، تاہم صنم جاوید اور عالیہ حمزہ عدالت میں پیش نہیں ہوئیں۔