وفاقی وزیر منصوبہ بندی احسن اقبال نے کہا کہ موسمیاتی تبدیلی ایک سنگین مسئلہ ہے جس سے پاکستان شدید متاثر ہوا۔

وفاقی وزیر منصوبہ بندی احسن اقبال نے ایشیا انرجی ٹرانزیشن سمٹ لاہور سے خطاب کرتے ہوئے کہا کہ ایشیا دنیا کی 50 فیصد آبادی کا مرکز ہے، جلد ہی ایشیا دنیا کے نصف سے زیادہ جی ڈی پی کا حامل ہوگا۔

 احسن اقبال نے کہا کہ توانائی کا بڑھتا استعمال موسمیاتی تبدیلی کا اہم محرک ہے، توانائی کی قلت اور مہنگی پیداوار برآمدات کے فروغ میں بڑی رکاوٹ رہی، جبکہ پاکستان میں ماحول دوست توانائی منصوبوں کی تکمیل ہماری اولین ترجیح ہے۔

 احسن اقبال نے کہا کہ کوئلے سے بجلی پیدا کرنے میں ماحول دوست پالیسیوں کے نفاذ کو یقینی بنایا، ترقی کے لیے منصوبوں میں جدت لانا ناگزیر ہے، جبکہ ہمیں اپنے منصوبوں کے لیے سرمایہ کاری کو فروغ اور نجی شعبے کی مدد سے نئے ذرائع تلاش کرنے ہوں گے۔

 احسن اقبال نے کہا کہ پالیسیوں کے بہتر معاشی مستقبل کے لیے سرمایہ کاری کا دوستانہ ماحول بنانا ہوگا، ایشیا کے ممالک کو باہمی تعاون کے ذریعے ترقی کی راہ پر گامزن ہونا چاہیے، جبکہ امیر و غریب ممالک کا ساتھ چلنا خطے کی ترقی کے لیے ناگزیر ہے، خطے کی بہتری کے لیے باہمی اشتراک وقت کی اہم ضرورت ہے۔