پشاور: مشیر اطلاعات خیبرپختونخوا بیرسٹر محمد علی سیف نے کہا ہے کہ پی ٹی آئی آئینی اور جمہوری اقدار میں رہ کر احتجاج ریکارڈ کرائے گی۔

وزیراعلیٰ خیبرپختونخوا کے مشیر اطلاعات بیرسٹر سیف نے نیوز کانفرنس کرتے ہوئے کہا کہ پاکستان تحریک انصاف کے 8 سمبتر کے جلسے کی تیاریاں جاری ہے، وزیر اعلیٰ کے پی علی امین تمام تر انتظامات کی خود نگرانی کر رہے ہیں۔

انہوں نے کہا کہ آٹھ فروری کو مینڈیٹ چرا کر اس حکومت کو مسلط کیا گیا ہے، اس حوالے سے جلسہ کیا جا رہا ہے، کسی کو ڈرنے کی ضرورت نہیں ہے، جلسہ کرنے کا مقصد اپنے تحفظات کا اظہار کرنا ہے۔

بیرسٹر سیف نے کہا کہ امید ہے اس بار انتظامیہ جلسے کی این او سی کو کینسل نہیں کرے گی، جلسہ صرف اجتماع نہیں ہوتا، عوام کی سوچ کی عکاسی ہوتا ہے، پی ٹی آئی آئینی اور جمہوری اقدار میں رہ کر احتجاج ریکارڈ کرائے گی۔

مشیر اطلاعات کا کہنا ہے کہ آئین پاکستان نے احتجاج کا حق دیا، کل اسلام آباد میں جلسے پر قانون سازی کر کے پابندی لگا دی گئی ہے۔

انہوں نے کہا کہ اختر مینگل کے استعفے کی حمایت کرتا ہوں، نواز شریف کو اختر مینگل کی طرح ضمیر کی آواز پر استعفیٰ دینا چاہیے، نواز شریف یاسمین راشد سے الیکشن ہار چکے، انکو الیکشن کمیشن نے الیکٹ کروایا ہے۔

بیرسٹر سیف نے مزید کہا کہ فیصل کریم کنڈی کو ابھی تک یقین نہیں آ رہا کہ وہ گورنر ہے، ان سے بڑے سیاسی رہنما اس پارٹی میں موجود ہے، گورنر وزیر اعلیٰ کو اعتماد کے ووٹ کی بات کرتے ہیں، اعتماد کے ووٹ پر گورنر صرف بیان نہ دیں بلکہ قانونی طور پر اسکا تقاضہ کریں، یہ اسمبلی وزیر اعلیٰ کی ہے اعتماد کے ووٹ کا مسئلہ نہیں ہے۔