وفاقی وزیر برائے منصوبہ بندی احسن اقبال نے کہا ہے کہ اعلیٰ تعلیم یافتہ، ماہرین اور ہنر مند اساتذہ کو ان کی صلاحیت کے مطابق تنخواہیں دینا ہوں گی۔

وفاقی وزیر برائے منصوبہ بندی احسن اقبال کی زیرِ صدارت اعلیٰ تعلیمی اداروں میں پے اسکیل کے نظام کا جائزہ لینے کے لیے بنائی گئی ٹاسک فورس کا اجلاس ہوا۔

اجلاس میں ایچ ای سی، وفاقی اور صوبائی اداروں کے اعلیٰ حکام نے شرکت کی۔

اس موقع پر احسن اقبال نے کہا کہ سولہ ماہ کی پی ڈی ایم کی حکومت میں ٹاسک فورس کو تشکیل دیا گیا تھا جس کا مقصد موجودہ ہے اسکیل کو بحال کرنا اور مارکیٹ ویلیو کے مطابق لانا ہے۔

ان کا کہنا تھا کہ آرٹیفیشل انٹیلیجنس اور کوانٹم کمپیوٹنگ میں 21 گریڈ کے پے سکیل میں بھی ایک اچھا استاد نہیں ملے گا، ہمارے بانڈ کے تحت بیرون ملک سے ڈاکٹریٹ کرنے والے یا تو نجی شعبے میں ملازمت کو ترجیح دیتے ہیں یا پھر مشرق وسطی میں نوکریاں ڈھونڈ لیتے ہیں۔

انہوں ںے کہا کہ مقصد پی ایچ ڈیز کی تعداد میں اضافہ نہیں بلکہ پاکستان کے لئیے افراد کار کی تیاری اور ملک کے لئیے ان سے کام لینا ہے، کم تنخواہوں کی وجہ ہم صلاحیت نوجوانوں کو بیرون ملک جانے کا جواز فراہم کر دیتے ہیں۔

وفاقی وزیر برائے منصوبہ بندی کا کہنا تھا کہ اعلیٰ معیار کی تعلیمی استعداد کے حامل افراد کو روکنا ناممکن ہو رہا ہے، اعلیٰ تعلیم یافتہ اور باصلاحیت نوجوانوں کو پاکستان کے اندر بہترین مواقع فراہم کرنا ہماری ذمہ داری ہے۔

احسن اقبال نے کہا کہ ملک میں اعلیٰ تعلیم کو فروغ دینا ہے تو تعلیمی شعبے میں بہترین تنخواہیں مقرر کرنا ہوں گی، یونیورسٹیز میں اعلیٰ تعلیم یافتہ پی ایچ ڈیز اور ماہرین کی موجودگی ان کے معیار کی علامت سمجھی جاتی ہے۔

ان کا کہنا تھا کہ دنیا کے ممتاز تعلیمی اداروں سے پی ایچ ڈی کرنے والے پاکستانیوں  کو اپنی یونیورسٹیز میں لے کر آنا ہمارے مستقبل کے لیے اہم ہے، اعلیٰ تعلیم یافتہ، ماہرین اور ہنر مند اساتذہ کو ان کی صلاحیت کے مطابق تنخواہیں دینا ہوں گی۔