لاہور:  وفاقی وزیر داخلہ محسن نقوی نے کہا ہے کہ قائداعظم کے اصولوں پر عمل پیرا ہونے کی اشد ضرورت ہے۔

وزیر داخلہ محسن نقوی نے قائداعظم محمد علی جناحؒ کی 76 ویں برسی  پر پیغام دیتے ہوئے کہا کہ قائد اعظم محمد علی جناح کی سیاسی بصیرت اور ولولہ انگیز قیادت کو شاندار الفاظ میں خراج عقیدت پیش کرتے ہیں۔

انہوں نے کہا کہ انتھک جدوجہد، غیر متزلزل عزم، بلند حوصلہ اور ایمانداری قائد اعظم کی شخصیت کو ممتاز کرتے ہیں، قائد اعظم کی جرات مندانہ قیادت کے بغیر  آزاد وطن کا خواب کبھی شرمندہ تعبیر نہ ہوتا۔

محسن نقوی نے کہا کہ قائد اعظم کا یہ احسان تاقیامت نہیں اتار سکتے کہ آج ہم بحیثیت قوم آزاد وطن میں سانس لے رہے ہیں، آج قائداعظم کے اصولوں پر عمل پیرا ہونے کی جتنی ضرورت ہے شاید پہلے کبھی نہ تھی۔

انکا کہنا تھا کہ قائد کے پاکستان میں کسی کو لسانی، طبقاتی اور گروہی بنیادوں پر فوقیت حاصل نہیں، قائد اعظم کے پاکستان میں اقلیتوں سمیت ہر ایک کو یکساں حقوق حاصل ہیں۔

وزیر داخلہ نے کہا کہ بدقسمتی سے قائد اعظم کے سنہری اصولوں پر عمل نہ کرکے ہم اقوام عالم میں پیچھے رہ گئے ہیں، قائد اعظم کے سنہری اصول اور درخشاں فرمودات ہمارے لئے مشعل راہ ہیں، قائد اعظم کے فرمودات پر چلنے میں ہی پاکستان کی ترقی کا راز مضمر ہے۔

انہوں نے مزید کہا کہ قائد اعظم کی عظیم جہد مسلسل کو پاکستانی قوم کبھی نہیں بھول سکتی، ہمیں یہ عزم کرنا چاہیے کہ قائد اعظم کے اصولوں کے مطابق ملک کی ترقی اور استحکام کے لیے اپنی ذمہ داریاں پوری کریں گے، آئیے اس عہد کی تجدید کریں کہ ہم اتحاد، تنظیم اور یقین محکم کے ساتھ آگے بڑھیں گے۔