وزیر تعلیم سردار شاہ نے کہا ہے کہ بیرون ممالک گئے 64 اساتذہ کو ملازمتوں سے برطرف کریں گے۔

وزیر تعلیم سردار شاہ نے سندھ اسمبلی کے باہر میڈیا سے گفتگو کرتے ہوئے کہا کہ بیرون ممالک گئے 64 اساتذہ کو ملازمتوں سے برطرف کریں گے، مفرور اساتذہ کو پیش ہونے کے لئے آخری موقعہ فراہم کیا گیا ہے۔

انہوں نے کہا کہ جو پیش نہیں ہوگا اس کے خلاف کاروائی ہوگی، ساڑھے 6 ہزار اساتذہ کی فہرست ہے جو مفرور ہیں۔

ان کا کہنا تھا کہ اپوزیشن لیڈر کا شکریہ ادا کرتا ہوں، تعلیم کے معاملے میں سب مل کر کام کرنا چاہتے ہیں، بچہ غیر سیاسی ہے اس کا کوئی قصور نہیں ہے، ہم مزید اساتذہ بھرتی کر رہے ہیں، سائنس کے اساتذہ بھرتی کریں گے۔

سردار شاہ نے کہا کہ گھوٹکی کے کچے کے علاقے میں کاروائی جا رہی ہے، جہاں جہاں پانی کم ہو رہا ہے وہاں کارروائی شروع کر رہے ہیں، کچے میں ڈاکوؤں کی پناہ گاہیں ہیں، منظم کارروائی جا رہی ہے۔

وزیر تعلیم کا کہنا تھا کہ کراچی میں حالات اچھے نہیں تھے جب چارج لیا، حالات بہتری کی طرف جا رہے ہیں، دہشتگردوں اور ڈاکوؤں کے خلاف پولیس کی کارروائیاں جاری ہیں، ہمارے جوانوں کی سلامتی ہو ہمت کے ساتھ وہ لڑ رہے ہیں۔

انہوں نے مزید کہا کہ پولیس کی کوشش ہے بہتر سے بہتر کارکردگی ہو، جب میں نے چارج لیا 27 مغوی تھے شکارپور میں اب صرف ایک رہ گیا ہے۔