نیویارک: وزیراعظم محمد شہباز شریف نے کہا ہے کہ آزاد فلسطین کے بغیر خطے میں پائیدار امن قائم نہیں ہوسکتا۔

وزیراعظم کی فلسطین کے صدر محمود عباس سے نیویارک میں ملاقات ہوئی جس میں دونوں رہنماؤں کے درمیان غزہ کی صورتحال پر تبادلہ خیال ہوا۔

ملاقات کے بعد وزیراعطم نے میڈیا سے گفتگو کرتے ہوئے کہا کہ اقوام عالم فلسطین کی آزادریاست کی تشکیل یقینی بنائیں، آزاد فلسطین کے بغیر خطے میں پائیدار امن قائم نہیں ہوسکتا۔

انہوں نے کہا کہ فلسطین کے معاملے کو طوالت دی گئی، دنیا کا امن تباہ ہوسکتا ہے، فلسطینی بھائیوں کی قربانیاں، صبر، استقامت رائیگاں نہیں جائے گا۔

شہباز شریف نے کہا کہ وقت آئے گا کہ آزاد فلسطین کا قیام ہوگا، فلسطین کے عوام کے ساتھ مکمل یکجہتی کا اظہار کرتے ہیں۔

انکا کہنا تھا کہ اسرائیل فلسطینیوں کی نسل کشی، بربریت کا مظاہرہ کررہا ہے، فلسطینیوں پر مظالم، بربریت کی بھرپور مذمت کرتے ہیں، پاکستانی عوام کے دل فلسطینی بھائیوں کےساتھ دھڑکتے ہیں۔

وزیراعطم نے مزید کہا کہ تاریخ نے ایسی تباہی کبھی نہیں دیکھی جو فلسطین کے ساتھ کیا گیا، وقت آگیا ہے سب اکٹھے ہو کرغزہ میں جنگ بندی کا مطالبہ کریں۔

دوسری جانب فلسطینی صدر محمود عباس کا کہنا تھا کہ پاکستان ابتدائی دور 1948 سے پہلے سے فلسطین کے ساتھ کھڑاہے، پاکستان کے لیے جتنا ممکن ہوا فلسطینی بھائیوں کی مدد کی، عالمی برادری کے سامنے بھی پاکستان نے فلسطین کی حمایت کی۔