اسلام آباد: ڈنمارک کے بڑے کاروباری گروپ نے پاکستان میں مائننگ انڈسٹری میں بھاری سرمایہ کاری کیلئے  دلچسپی کا اظہار کیا ہے۔

ڈنمارک کے سفیر جیکب لینولف کی سربراہی میں ڈینش کمپنی ایف ایل سمڈتھ کے سی ای او جناب میکو کیٹو کا وفاقی وزراء سے تفصیلی سیشن ہوا جس میں ڈنمارک کے بڑے گروپ نے کاروباری سرگرمیوں میں دلچسپی کا اظہار کیا۔

وفاقی وزراء ڈاکٹر مصدق ملک، محمد اورنگزیب،  عبدالعلیم خان اور جام کمال خان کا ڈنمارک بزنس گروپ کے ساتھ اہم اجلاس ہوا جس میں وفاقی وزراء نے کہا کہ  پاکستان میں معدنی وسائل کے وسیع ذخائر موجود ہیں اور بڑی سرمایہ کاری ہو سکتی ہے، ایف ایل سمڈتھ مائننگ کے شعبے دنیا بھر میں اہم مقام رکھتی ہے۔

اجلاس کے دوران ڈنمارک سفیر نے گفتگو کرتے ہوئے کہا کہ ڈنمارک گذشتہ 30 برسوں سے پاکستان میں اسٹیٹ آف دی آرٹ منصوبوں میں سرگرم عمل ہے۔

سی ای او ایف ایل سمڈتھ نے کہا کہ مائننگ انڈسٹری میں قابل عمل تجاویز اور فائدہ مند منصوبوں کے ساتھ آگے بڑھیں گے۔

اس موقع پر وفاقی وزیر مصدق ملک کا کہنا تھا کہ پاکستان معدنیات کے شعبے میں غیرملکی سرمایہ کاری کا خیر مقدم کرے گا، ٹیکنالوجی کے تبادلے اور طلبہ کے لیے ریسرچ و ٹریننگ کے مواقع پر بھی کام کریں گے۔

دوسری جانب وفاقی وزیر خزانہ محمد اورنگزیب نے اپنے محکمے کی طرف سے ہر ممکن تعاون کی یقین دہانی کرائی۔

وفاقی وزیر عبدالعلیم خان نے کہا کہ ڈنمارک سے سرمایہ کاری بہت حوصلہ افزا ہے، مثبت نتائج سامنے آئیں گے، حکومت نجی شعبے کے تعاون سے کاروباری سرگرمیوں کے فروغ میں دلچسپی رکھتی ہے۔

دوران اجلاس جام کمال خان نے کہا کہ ڈنمارک کے معدنیات کے شعبے میں تعاون اور دو طرفہ کاروباری سرگرمیوں سے ملکی معیشت مضبوط ہو گی، ڈنمارک پاکستان کا انتہائی اہم کاروباری شراکت دار ہے ہم اس کورڈیل ریلیشن شپ کو اگے بڑھتا دیکھنا چاہتے ہیں۔