وزیراعلیٰ سندھ سید مراد علی شاہ نے کہا ہے کہ اگلے مہینے ملیر ایکسپریس وے کورنگی کاز وے تا قائد آباد کا افتتاح کروں گا۔

سید مراد علی شاہ کی صدارت میں ملیر ایکسپریس وے سے متعلق اجلاس ہوا جس میں وزیراعلیٰ سندھ نے ملیر ایکسپریس وے کے کام کی پیشرفت کا جائزہ لیا۔

اجلاس میں وزیر منصوبہ بندی و ترقی ناصر حسین شاہ، چیف سیکریٹری آصف حیدر شاہ، سیکریٹری توانائی مصدق خان، چیئرمین پی اینڈ ڈی نجم شاہ اور سیکریٹری خزانہ فیاض جتوئی شریک ہوئے۔

سیکریٹری ٹو سی ایم رحیم شیخ اور پبلک پرائیویٹ پارٹنرشپ یونٹ کے سی ای او اسد ضامن بھی اس موقع پر موجود تھے۔

وزیراعلیٰ سندھ کو آگاہی دی گئی کہ بارشوں کے باوجود ملیر ایکسپریس وے پر تیزی سے کام جاری ہے، ملیر ایکسپریس وے کا تقریباً پہلا فیز کا کام 84 فیصد مکمل ہوگیا ہے، دوسرے فیز پر 35 فیصد کے قریب کام مکمل کیا گیا ہے۔

مراد علی شاہ کا کہنا تھا کہ قیوم آباد تا کاٹھوڑ 50 کلو میٹر طویل ملیر ایکسپریس وے پر آسان اور محفوظ سفر ممکن ہوگا۔

انہوں نے جام صادق پل پر کنیکٹوٹی کے کام کو تیزی کرنے کی ہدایت دی۔

وزیراعلیٰ سندھ کو بریفنگ دی گئی کہ ملیر ایکسپریس کے ای بی ایم انٹرچینگ کو مکمل کرلیا گیا۔

مراد علی شاہ نے ہدایت دی کہ ملیر ایکسپریس وے کے شاہ فیصل انٹر چینج کا کام ایک ہفتہ میں مکمل جائے، انہوں نے قائدآباد کے ساتھ کنیکوٹی کے کام اگلے ہفتہ تک مکمل کرنے کی بھی ہدایت کی۔

وزیر منصوبہ بندی و ترقی ناصر شاہ کا کہنا تھا کہ میں ازخود کام کا کا جائزہ لے رہا ہوں۔

وزیراعلیٰ سندھ سید مراد علی شاہ نے کہا کہ اگلے مہینے ملیر ایکسپریس وے کورنگی کاز وے تا قائد آباد کا افتتاح کرونگا، چھ رویہ ملیر ایکسپریس وے ایم نائن موٹروے اور نیشنل ہائی وے سے منسلک ہوگا، منصوبے میں 6 انٹرچینج، 3 پل اور ایک انڈرپاس شامل ہے اور 5 کمپیوٹرائیڈ کانٹے بھی لگائے جائینگے۔

وزیراعلیٰ سندھ نے کورنگی کاز وے تا کنیکٹوٹی کا کام تیز کرنے کی ہدایت کردی۔