نیشنل کاؤنٹر ٹیرارزم اتھارٹی (نیکٹا) کے زیر اہتمام عالمی یوم امن کے حوالے سے ایف نائن پارک میں سائیکل ریلی منعقد ہوئی جس میں  تمام طبقہ ہائے زندگی سے وابستہ افراد ،خصوصی طور پر معذور افراد اور بچوں کی کثیر تعداد شامل تھی۔

اس سرگرمی کے انعقاد کا بنیادی مقصد امن و آشتی کے رواج کو تقویت دینا تھا۔

اس موقع پر ڈائریکٹر جنرل نیکٹا صالحہ ذاکر شاہ  نے بطور مہمان خصوصی شرکائے ریلی سے خطاب کرتے ہوئے کہا کہ امن ہی ترقی کا واحد زینہ ہے۔ پاک وطن کو محفوظ اور پر امن رکھنے کے لیے تمام شہریوں کو اپنا فعال کردار ادا کرنا ہو گا۔

انہوں نے مزید کہا کہ نیکٹا امن کے فروغ کے لیے ہمہ وقت کوشاں ہے اس لحاظ سے نیکٹا ہر قسم کی مثبت سرگرمی کی حوصلہ افزائی کرتا ہے اور اسی سوچ کو عملی جامہ  پہنانے کے لیے ہر سال مختلف پروگرامز اور مقابلہ جات کا انعقاد بھی کرتا ہے جس میں تمام پاکستانیوں کو شامل ہونے کی دعوت دیتا ہے تاکہ مل کر پاکستان کا حقیقی تشخص دنیائے عالم میں دکھایا جا سکے۔

سائیکل ریلی میں نیکٹا  سے سینئر اینالسٹ عدنان خالق بھٹی، اینالسٹ حیدر عباس خان، جونئیر اینالسٹس نایاب بتول، ادریس خان و دیگر افسران، اسلام آباد سائیکلنگ ایسوسی ایشن کے عہدیداران، فیملیز اور بچوں کی پر عزم کثیر تعداد موجود تھی ۔

حاضرین نے نیکٹا کے اس اقدام کو سراہتے ہوئے اسکے تسلسل کو قائم رکھنے کی امید ظاہر کی۔ بعد ازاں شرکائے ریلی کی حوصلہ افزائی کے لیے ان میں اعزازی اسناد اور  ٹوپیاں تقسیم کی گئیں۔