اسلام آباد: الیکشن کمیشن آف پاکستان نے انٹرا پارٹی انتخابات کیس میں پاکستان تحریک انصاف (پی ٹی آئی) کو دستاویزات جمع کروانے کے لئے مہلت دے دی۔

ممبر سندھ نثار درانی کی سربراہی میں الیکشن کمیشن کے 3 رکنی کمیشن نے پی ٹی آئی انٹرا پارٹی انتخابات کیس کی سماعت کی۔ چیئرمین پی ٹی آئی بیرسٹر گوہر الیکشن کمیشن میں پیش ہوئے۔

دوران سماعت ممبر بلوچستان نے استفسار کیا کہ پی ٹی آئی کے الیکشن کیا چمکنی میں ہوئے تھے؟ جس پر بیرسٹر گوہر نے کہا کہنہیں جناب، انتخابات اسلام آباد میں بھی ہوئے تھے، ہم نے دستاویزات جمع کروانی ہیں ایک ہفتہ سے دس دن تک کا وقت دیں۔

بینچ نے الیکشن کمیشن حکام سے سوال کیا کہ اگر پی ٹی آئی کے انٹرا پارٹی الیکشن کو ہم اب بھی تسلیم نہیں کرتے تو کیا مستقبل ہو گا؟ ڈی جی پولیٹیکل فنانس نے بتایا کہ پارٹی کا کوئی تنظیمی ڈھانچہ نہیں رہے گا۔

بینچ نے ڈی جی پولیٹیکل فنانس کو ہدایت دی کہ آپ ہمیں اس نکتہ پر معاونت فراہم کریں۔

ممبر کے پی کے نے بھی استفسار کیا کہ اگر پی ٹی آئی کے انٹرا پارٹی انتخابات کو اب بھی تسلیم نہیں کرتے تو ہمارے پاس کیا کرنے کا اختیار ہے۔

ڈی جی پولیٹیکل فنانس نے کہا کہ الیکشن ایکٹ کے سیکشن 208 کے تحت کارروائی ہو سکتی ہے، دو انٹرا پارٹی انتخابات کے درمیان پانچ سال کا وقفہ ہونا چاہیے تھا۔

ممبر خیبر پختونخوا نے کہا کہ آپ ابھی جواب نہ دیں مستقبل میں اس نکتہ پر ہماری معاونت کریں۔

اس موقع پر بیرسٹر گوہر نے کہا کہ ہم بھی اس معاملہ پر آپ کو معاونت دیں گے، انٹرا پارٹی الیکشن نہ کروانے پر الیکشن کمیشن جو کر سکتا تھا اس نے کر لیا۔

بعدازاں الیکشن کمیشن نے پی ٹی آئی کو دستاویزات جمع کروانے کیلئے مہلت دیتے ہوئے سماعت 2 اکتوبر تک ملتوی کردی۔