اسلام آباد: پاکستان نے لبنان میں ہونے والے حملوں کی مذمت کی ہے۔

ترجمان دفتر خارجہ ممتاز زہرا بلوچ نے ہفتہ وار میڈیا بریفنگ دیتے ہوئے کہا کہ پاکستان الیکٹرانک الات کے ذریعے لبنان میں حملوں کی مذمت کرتا ہے، پاکستان ہر طرح کی دہشت گردی کی مذمت کرتا ہے۔

انہوں نے کہا کہ پاکستان 12 ستمبر کو فلسطینی شہریوں پر اسرائیلی فضائی حملوں کی بھی مذمت کرتا ہے، پاکستان فلسطینی علاقوں پر اسرائیل کے غیر قانونی قبضے کے حوالے سے آئی سی جے کے فیصلے پر عمل درآمد کا مطالبہ کرتا ہے۔

ممتاز زہرا بلوچ نے کہا کہ عالمی قوانین کی خلاف ورزیوں پر اسرائیل سے جواب طلب کیا جانا چاہیے، اسرائیل کی مہم جوئی علاقائی امن کے لئے خطرہ ہے۔

’’مقبوضہ کشمیر میں نام نہاد انتخابات کی کوئی حیثیت نہیں‘‘

انکا کہنا تھا کہ مقبوضہ کشمیر میں نام نہاد بھارتی آئین کے تحت انتخابات کی کوئی حیثیت نہیں، پاکستان بھارت کو یاد دلانا چاہتا ہے کہ مقبوضہ بین الاقوامی طور پر تسلیم شدہ متنازعہ خطہ ہے، مقبوضہ کشمیر میں استصواب رائے کے سوا کوئی متبادل ذریعہ کشمیری عوام کے حق خود ارادیت متبادل نہیں ہو سکتا۔

’’روس کے نائب وزیراعظم کا دورہ پاکستان جاری ہے‘‘

ترجمان دفتر خارجہ نے کہا کہ روس کے نائب وزیراعظم الیکسی اوور چک کا دورہ پاکستان جاری ہے، نائب روسی وزیراعظم کا دورہ پاکستان وزیراعظم شہباز شریف اور صدر ولادی میر پوٹن کے وژن کا مظہر ہے۔

انہوں نے کہا کہ پاکستان اور روس نے تجارتی راہداری اور مرکنٹائل ایکسچینج کے حوالے سے مفاہمت کی یادداشتوں پر دستخط کیے ہیں۔

’’وزیراعظم اقوام متحدہ کی جنرل اسمبلی کے اجلاس میں شرکت کریں گے‘‘

ممتاز زہرا بلوچ نے کہا کہ وزیراعظم شہباز شریف 23 سے 27 ستمبر تک اقوام متحدہ کی جنرل اسمبلی کے اجلاس میں شرکت کریں گے، وزیراعظم کے ساتھ نائب وزیراعظم اسحاق ڈار اور اعلیٰ احکام بھی نیویارک جائیں گے۔

انکا کہنا تھا کہ وزیراعظم شہباز شریف اقوام متحدہ کی سلامتی کونسل کے ایجنڈے پر مسئلہ کشمیر اور فلسطین کے بارے میں بھی پاکستان کا مؤقف اجاگر کریں گے، وزیراعظم کی نیویارک میں پاکستانی تارکین وطن سے بھی ملاقات ہوگی جبکہ نائب وزیراعظم اسحاق ڈار نیویارک میں او آئی سی سمیت دیگر تنظیموں کے اجلاسوں میں بھی پاکستان کی نمائندگی کریں گے۔

’’سندھ طاس معاہدہ پاکستان اور بھارت کے درمیان اہم معاہدہ ہے‘‘

ترجمان نے کہا کہ سندھ طاس معاہدہ پاکستان اور بھارت کے درمیان اہم معاہدہ ہے، پاکستان سندھ طاس معاہدے کی پاسداری کر رہا ہے، بھارت کو بھی معاہدے کی پاسداری کرنی چاہیے۔

’’پاکستان افغان قونصل جنرل کی کسی بھی وضاحت کو قبول نہیں کرتا‘‘

ممتاز زہرا بلوچ نے مزید کہا کہ مہمان ملک اپنے قومی ترانے کی بے حرمتی کبھی برداشت نہیں کرے گا، پاکستان افغان قونصل جنرل کی جانب سے کسی بھی وضاحت کو قبول نہیں کرتا، حفیظ محب اللہ شاکر کے پاس ویزہ ہے اور وہ سفارتکار ہیں۔