امیر جماعت اسلامی حافظ نعیم الرحمان نے کہا ہے کہ جماعت اسلامی کی “حق دو عوام کو” تحریک زور و شور سے جاری ہے۔

امیر جماعت اسلامی حافظ نعیم الرحمان نے نیوز کانفرنس کرتے ہوئے کہا کہ موجودہ حالات کے تناظر میں آئینی ترمیمی بل ملک کیلئے خطرناک بات ہوگا، حکومت کو اس معاملے کو نہیں چھیڑنا چاہیے۔

انہوں نے کہا کہ سلمان اکرم راجا نے بیان دیا انکے لوگوں کو ڈرایا اور دھمکایا جارہا ہے، سلمان اکرم نے کہا ڈرانے اور دھمکانے کا نوٹس لینا چاہیے، سلمان اکرم راجا کے بیان کا نوٹس اور انکوائری کرائی جائے۔

ان کا کہنا تھا کہ جماعت اسلامی کی حق دو عوام کو تحریک زور و شور سے جاری ہے، ہماری تحریک کے باعث عوام کو بہتر نتائج ملیں گے، حق دو عوام کو تحریک کی ممبر شپ کیلئے لوگ بڑھ چڑھ کر حصہ لے رہے ہیں۔

حافظ نعیم الرحمان نے کہا کہ ممبر شپ مہم میں ملک کی اقلیتی برادری بھی برابر کی شریک ہے، حکومت مرضی کی ترمیم کرنے کیلئے ایسے ہتھکنڈے استعمال کررہی ہے، ایسی آئینی ترمیم ہو بھی گئی تو اس کی کیا حیثیت ہوگی؟

امیر جماعت اسلامی کا کہنا تھا کہ مہنگائی بڑھ رہی ہے، بیروزگاری میں اضافہ ہو رہا ہے، مسئلے کو حکومت نہ چھیڑے قوم دیکھ رہی ہے کونسی جماعت کیا کررہی ہے، حکومت چاہتی ہے سپریم کورٹ میں مرضی کے ججز لگائے، اپنی مرضی کا فیصلہ کروانے کیلئے پارلیمانی ممبران کیساتھ یہ سلوک کررہے ہیں۔

انہوں نے کہا کہ کے پی اور بلوچستان کے مسائل سے سوال اٹھنا شروع ہو گئے ہیں، پاکستان میں امریکہ نوازی کے باعث بدامنی کے حالات پیدا ہوئے تھے، رحیم یار خان میں حملے میں 12 پولیس اہلکار شہید ہوئے۔

ان کا کہنا تھا کہ کے پی کے جنوبی اضلاع میں پولیس نے تھانوں کا بائیکاٹ کیا۔