اسلام آباد: فیڈرل بورڈ آف ریونیو (ایف بی آر) ریونیو شارٹ فال پر وزیر اعظم محمد شہباز شریف ایف بی آر کی کارکردگی سے نالاں ہیں۔

ذرائع کے مطابق چیئرمین ایف بی آر کی جانب سے بورڈ ممبران تبدیل کیے جانے کا امکان ہے، ممبر ان لینڈ ریونیو آپریشنز، ممبر کسٹمز آپریشنز، ممبر کسٹم پالیسی ونگ و دیگر کی تبدیلی کے امکانات ہیں۔

ایف بی آر کے ذرائع نے بتایا ہے کہ تقریباً 100 ارب روپے ریونیو شارٹ فال کی رپورٹ وزیراعظم کو پیش کی گئی ہے، جس کے بعد وزیراعظم نے چیئرمین ایف بی آر کو آئندہ ماہ ٹارگٹ پورا کرنے اور ٹیم میں تبدیلیوں کا گرین سگنل دیا۔

ذرائع ایف بی آر کا کہنا ہے کہ چیئرمین ایف بی آر راشد لنگڑیال ٹیم میں تبدیلیاں کر کے اپنی ٹیم تیار کر رہے ہیں، ممبر ان لینڈ ریونیو آپریشنز میر بادشاہ خان وزیر کو تبدیل کیے جانے کا امکان ہے جبکہ ممبر کسٹم پالیسی ثریا احمد بٹ اور ممبر پی آر ایف بی آر کو بھی تبدیل کیا جا سکتا ہے۔

ذرائع کے مطابق ایف بی آر کے ممبر کسٹمز پالیسی اور ممبر پی آر دو ماہ بعد دسمبر میں ریٹائر ہو رہے ہیں، رواں ماہ ستمبر کے دوران تقریباً 1220 ارب روپے کا ریونیو ہدف حاصل کرنا ہو گا۔

ایف بی آر کی جانب سے جاری کردہ نوٹیفکیشن کے مطابق ممبر کسٹم آپریشنز اشہد جواد کی جگہ گریڈ اکیس کے افسر جنید جلیل کی تعیناتی ہو گئی ہے۔