راولپنڈی: سیکیورٹی فورسز نے خیبر پختونخوا میں 2 مختلف کارروائیاں کے دوران 4 خارجی دہشت گردوں کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق 26 اور 27 اکتوبر کو سیکیورٹی فورسز نے خیبرپختونخوا میں دو مختلف کارروائیاں کیں۔

شمالی وزیرستان میں سیکیورٹی فورسز نے انٹیلیجنس بیسڈ آپریشن کیا جب کہ اس کارروائی کے دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔

آئی ایس پی آر کے مطابق شمالی وزیرستان میں آپریشن کے دوران خارجی انصاف اللہ سمیت 2 دہشت مارے گئے۔

ترجمان پاک فوج نے بتایا کہ سیکیورٹی فورسز نے دوسری کارروائی ضلع خیبر میں کی، جس دوران بھی 2 دہشت گرد ہلاک اور 3 زخمی ہوگئے۔

پاک فوج کے شعبہ تعلقات عامہ کا کہنا ہے کہ ہلاک ہونے والے خارجی دہشت گردوں کے قبضے سے بڑی مقدار میں اسلحہ اور بارودی مواد برآمد ہوا ہے۔

ترجمان پاک فوج کا کہنا تھا کہ مارے جانے والے خارجی دہشت گرد قانون نافذ کرنے والے اداروں اور شہریوں کے خلاف کارروائیوں میں ملوث تھے۔

آئی ایس پی آر نے کہا کہ علاقے کو خارجی دہشت گردوں سے پاک کرنے کے لیے سیکیورٹی فورسز کا سینیٹائزیشن آپریشن جاری ہے۔

ترجمان پاک فوج کا مزید کہنا تھا کہ پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پرعزم ہیں۔