اسلام آباد: آسٹریلیا کے ہائی کمشنر نیل ہاکنز وزارت داخلہ پہنچے جہاں انکی وفاقی وزیر داخلہ محسن نقوی سے ملاقات ہوئی۔

وزیر داخلہ محسن نقوی نے وزارت داخلہ آمد پر آسٹریلوی ہائی کمشنر کا خیر مقدم کیا اور اس دوران بارڈر مینجمنٹ اور انسداد انسانی اسمگلنگ کے شعبوں میں تعاون بڑھانے پر اتفاق کیا گیا۔

ملاقات میں اسلام آباد کیپیٹل ٹریٹری اور آسٹریلین کیپیٹل ٹریٹری کو سسٹر سٹیز کا درجہ دینے پر بات چیت کی گئی اور پاکستان کرکٹ بورڈ اور آسٹریلین کرکٹ بورڈ کے مابین تعاون کو مزید فروغ دینے پر بھی اتفاق کیا گیا۔

ملاقات میں جوائنٹ ورکنگ گروپ کا اجلاس دسمبر میں آسٹریلیا میں منعقد کروانے پر بھی اتفاق کیا گیا اور دوطرفہ تعلقات اور باہمی دلچسپی کے امور پر بھی تبادلہ خیال کیا گیا۔

اس موقع پر محسن نقوی نے گفتگو کرتے ہوئے کہا کہ پاکستانی ٹیم 30 اکتوبر کو آسٹریلیا کے دورے پر روانہ ہو گی، امید ہے اس دورے کے دوران دونوں ممالک کی عوام کو بھر پور کھیل دیکھنے کو ملے گا، پاکستانی خواتین کھلاڑیوں کو بگ بیش کیلئے این او سی جاری کیے جائیں گے۔

دوسری جانب آسٹریلوی ہائی کمشنر نے وزیر داخلہ کو آسٹریلوی ٹیم کا دستخط شدہ کرکٹ بیٹ بھی پیش کیا اور کہا کہ آسٹریلیا ٹریننگ، خواتین اور نابینا افراد کی کرکٹ کے شعبوں میں تعاون فراہم کرے گا۔

وفاقی وزیر داخلہ کا کہنا تھا کہ بارڈر مینجمنٹ اور انسداد انسانی اسمگلنگ کے لئے پوری ٹیم مامور کی گئی ہے، آسٹریلیا سمیت تمام ممالک کی جانب ہونے والی انسانی اسمگلنگ کے تدارک کیلئے بھر پور طریقے سے کام کر رہے ہیں، اس سلسلے میں ایف آئی اے کی استعداد کار بڑھانے پر بھی کام کیا جا رہا ہے۔

آسٹریلوی ہائی کمشنر نے کہا کہ پاکستان آسٹریلیا کے بارڈر مینجمنٹ کے جدید طریقوں اور آلات سے استفادہ حاصل کر سکتا ہے۔

وزیر داخلہ نے آسٹریلوی ہائی کمشنر کی پیشکش کا خیر مقدم کیا اور کہا کہ افغان مہاجرین کی آسٹریلیا منتقلی میں پاکستان ہر ممکن سہولت فراہم کر رہا ہے۔