پاکستان کرکٹ بورڈ کے چیئرمین محسن نقوی نے آئی سی سی چیمپئنز ٹرافی سے قبل نیشنل بینک کرکٹ اسٹیڈیم کراچی کی اپ گریڈیشن کا ٹاسک دے دیا۔

نیشنل بینک کرکٹ اسٹیڈیم اپ گریڈیشن پراجیکٹ تیزی سے آگے بڑھ رہا ہے، اس حوالے سے چیئرمین پی سی بی محسن نقوی نے نیشنل بینک کرکٹ اسٹیڈیم کراچی کا دورہ کیا اور پراجیکٹ پر پیش رفت کا جائزہ لیا۔

محسن نقوی نے اسٹیڈیم میں جاری تعمیراتی کاموں کا معائنہ کیا اور اپ گریڈیشن پراجیکٹ کا مشاہدہ بھی کیا۔

چیئرمین پی سی بی نے اسکور اسکرین کو مناسب جگہ نصب کرنے کی ہدایت دیتے ہوئے کہا کہ اسکور اسکرین کی وجہ سے شائقین کرکٹ کو میچز دیکھنے میں مشکل پیش آتی ہے، اسکرین کو اونچائی پر نصب کیا جائے تاکہ شائقین کو کسی قسم کی دشواری کا سامنا نہ کرنا پڑے۔

محسن نقوی نے شائقین کرکٹ کی سہولت کیلئے پارکنگ ایریا کو اسٹیڈیم کے قریب کرنے کی بھی ہدایت دی اور کہا کہ اپ گریڈیشن پراجیکٹ پر کام مزید تیز کیا جائے، دن رات ایک کر کے منصوبے کو وقت دے قبل مکمل کیا جائے۔

انہوں نے مزید کہا کہ دنیائے کرکٹ کی ٹاپ ٹیمیں چیمپئنز ٹرافی ٹورنامنٹ کے لئے آ رہی ہیں، پاکستان کے لئے چیمپئنز ٹرافی کا انعقاد ایک اعزاز ہے۔

علاوہ ازیں چیئرمین پی سی بی محسن نقوی نے ایف ڈبلیو او کے حکام کو پراجیکٹ کی بروقت تکمیل کے لیے ہدایات دیں۔

اس دوران ایف ڈبلیو او کے حکام نے اپ گریڈیشن پراجیکٹ پر ہونے والی پیش رفت کے بارے میں چیئرمین محسن نقوی کو بریفنگ دی۔

یاد رہے کہ ایڈوائزر عامر میر، مینجر نیشنل بینک کرکٹ اسٹیڈیم ارشد خان اور ایف ڈبلیو او کے اعلیٰ حکام بھی اس موقع پر موجود تھے۔