گورنر خیبرپختونخوا فیصل کریم کنڈی نے کہا ہے کہ معاشرے کے تمام افراد کی جان و مال کی حفاظت حکومت کا اولین فرض ہے۔

سرینہ ہوٹل اسلام آباد میں مالم جبہ قافلے میں شامل غیر ملکی سفیروں کی جانب سے مالم جبہ دھماکے کے شہید پولیس اہلکار کو خراج عقیدت پیش کرنے کی تقریب ہوئی۔

تقریب میں گورنر خیبرپختونخوا فیصل کریم کنڈی اور 14 ممالک کے سفراء / ہائی کمشنرز نے شرکت کی۔

تقریب میں شہید پولیس اہلکار برہان علی کا بیٹا اور خاندان کے افراد(بھائی، چچا،) کو خصوصی طور پر مدعو کیا گیا۔

14 ممالک کے سفراء/ہائی کمشنرز نے شہید پولیس اہلکار کے خاندان کے افراد کو اپنی جانب سے مشترکہ دستخط شدہ تعزیتی خط ارسال کیا۔

غیر ملکی سفراء/ہائی کمشنرز نے شہید پولیس اہلکار کو خراجِ عقیدت پیش کیا اور شہید کی فیملی سے دلی ہمدردی کا اظہار اور شہید پولیس اہلکار کی بہادری کو سلام پیش کیا۔

ڈین آف ڈپلومیٹک کور اور ترکمانستان کے سفیر کی دعوت پر تقریب میں آذربائیجان، ایران، پرتگال، بوسنیا، ایتھوپیا، قازکستان، روس، ویتنام، ازبکستان، زمبابوے، تاجکستان انڈونیشیا، رونڈا کے سفراء/ہائی کمشنرز و دیگر حکام شریک تھے۔

فیصل کریم کنڈی نے تقریب سے خطاب کرتے ہوئے کہا کہ خیبرپختونخوا کے لوگ امن پسند اور پیار و محبت والے ہیں، صوبے کے عوام انتہا پسندی کے خاتمے اور خطے میں امن و امان کی بحالی کیلئے متحد ہیں۔

انہوں نے کہا کہ معاشرے کے تمام افراد کی جان و مال کی حفاظت حکومت کا اولین فرض ہے، سوات میں غیر ملکی سفراء کے قافلے پر دہشت گردانہ حملے نے صوبہ کے عوام کو غمزدہ کیا۔

ان کا کہنا تھا کہ غیر ملکی سفراء کا شہید پولیس اہلکار کی فیملی سے ہمدردی اور عزت بخشنے پر شکریہ ادا کرتا ہوں، غیر ملکی سفراء کا یہ اقدام خیبرپختونخوا کے عوام کی دہشتگردی کیخلاف جنگ میں قربانیوں کا اعتراف ہے۔

گورنر خیبرپختونخوا نے کہا کہ پولیس کانسٹیبل برہان علی نے غیر ملکی مہمانوں کی حفاظت کرتے ہوئے اپنی جان کا نذرانہ پیش کیا، شہید کی خاندان کو یقین دلاتے ہیں کہ انہیں تنہا نہیں چھوڑیں گے۔