اسپیکر پنجاب اسمبلی ملک محمد احمد خان نے کہا کہ 26  ویں آئینی ترمیم کےکسی ایک نکتے پر بھی کسی کو اعتراض ہے تو بتائیں۔

اسپیکر پنجاب اسمبلی ملک محمد احمد خان نے لاہور پریس کلب میں نیوز کانفرنس کرتے ہوئے کہا کہ آرٹیکل 184  تھری سے 2 حکومتوں کو گھر  بھیجا گیا۔

انہوں نے کہا کہ جس نے بھی اختیار دینے ہیں وہ پارلیمان کے خلاف دینے ہیں، آرٹیکل 62 اور 63  آئین میں نہیں تھا، پارلیمان کے ارکان سے سوال ہے کیا آپ نے آئین نہیں پڑھاہوا؟

ان کا یہ بھی کہنا تھا کہ ججز کون ہوگا اس کا اختیار ججزکےپاس ہوگا، یہ اختیار کہ جج کون رہےگااس کا فیصلہ بھی ججز کریں گے۔

ملک محمد احمد خان نے کہا کہ طالب علمی سے اب تک لاہور پریس کلب  کو ایک موثر ادارہ کے طورپر دیکھا ہے، صحافی عوام الناس کے مسائل پر بات کرتے ہیں، جبکہ اخلاق باجوہ کے ساتھ رفاقت بہت پرانی ہے جب بیمار تھے تو میرے پاس آئے۔

انہوں نے کہا کہ اخلاق باجوہ کی صحافت کے لیے خدمات کو کبھی فراموش نہیں کیاجاسکتا ، اخلاق باجوہ بیماری سے لڑتے رہے لیکن انہیں ہم بچا نہ سکے۔

ملک محمد احمد خان کا یہ بھی کہنا تھا کہ جس طرح اسمبلی بلڈنگ ہے اس کی شاہانہ انداز کی بات نہیں بلکہ عوامی گھر ہے، اسمبلی بلڈنگ جمہوریت کے گھر ہیں۔

انہوں نے یہ بھی کہا کہ جتنی بار بھی اسمبلی کی سیڑھیوں پر گیا تو کیمرہ مین کو شدید گرمی میں بھاری کیمرے اسٹینڈ اٹھائے پسینے میں شرابور  دیکھا اس طرح  کام کرنا کسی جہاد سے کم نہیں ہے۔

 ملک محمد احمد خان نے کہا کہ پریس گیلری کا دفتر میں ہر وہ سہولت جو ایم پی اے کو ہے وہ دی گئیں، پریس گیلری کے لیے اچھے ماحول کے لیے کام شروع کردیا ہے۔