اسلام آباد: وزیر اعظم شہباز شریف کی زیر صدارت  شنگھائی تعاون تنظیم (ایس سی او) کی کونسل آف ہیڈز آف گورنمنٹ کا 23 واں اجلاس شروع ہوگیا ہے۔

وزیراعظم نے ایس سی او اجلاس میں شرکت کرنے والے سربراہان حکومت کا آمد پر پرتپاک استقبال کیا، معزز مہمان کو خوش آمدید کہا اور سب سے مصافحہ بھی کیا۔

ایس سی او کانفرنس کے باقاعدہ آغاز سے قبل تمام وفود کے سربراہوں نے گروپ فوٹو بنوائی، گروپ فوٹو کے بعد تمام سربراہان جناح کنونشن سینٹر کے مرکزی ہال میں تشریف لے گئے، جس کے بعد وزیراعظم شہباز شریف کی افتتاحی تقریر سے ایس سی او کانفرنس کا باقاعدہ آغاز ہوگیا۔

 اجلاس میں شریک رکن ممالک کے بیشتر سربراہان حکومت اور وزراء گزشتہ روز وفاقی دارالحکومت اسلام آباد پہنچے تھے جبکہ چین کے وزیر اعظم لی چیانگ پہلے ہی سرکاری دورے پر پاکستان میں ہیں۔

چین کے وزیراعظم لی چیانگ، روس کے وزیراعظم میخائل مشوستن، ایران کے اول نائب صدر محمد عارف رضا اور بھارتی وزیر خارجہ جے شنکر کانفرنس میں شریک ہیں۔

اس کے علاوہ بیلاروس کی نمائندگی وزیراعظم رومان گولوف چینکو کررہے ہیں جبکہ قازقستان کے وزیراعظم اولژاس بیک تینوف اور تاجکستان کے وزیراعظم کوہر رسول زادہ بھی کانفرنس میں موجود ہیں۔

 کرغزستان کی نمائندگی کابینہ کے چیئرمین ژاپاروف عقیل بیگ کریں گے اور ازبکستان کے وزیراعظم عبداللہ اریپوف اپنے ملک کے کی نمائندگی کررہے ہیں جبکہ بطور خصوصی مہمان کانفرنس میں شرکت کرنے والے ترکمانستان کی نمائندگی کابینہ کے ڈپٹی چیئرمین راشد میری دوف کررہے ہیں۔

وزیراعظم ایس سی او کانفرنس سے افتتاحی خطاب کررہے ہیں، وزیراعظم کے بعد غیر ملکی وفود کے سربراہان کانفرنس سے خطاب کریں گے اور غیر ملکی لیڈرز کے خطاب کے بعد دستاویزات پر دستخط کیے جائیں گے۔

 وزیراعظم شہباز شریف کے اختتامی کلمات سے کانفرنس کے ایجنڈا آئٹمز مکمل ہوں گے، تاہم نائب وزیراعظم اسحاق ڈار اور ایس سی او کے سیکریٹری جنرل کانفرنس کے اختتام پر آج میڈیا سے گفتگو کریں گے جبکہ وزیراعظم کی جانب سے کانفرنس کے شرکاء کے اعزاز میں ظہرانے کا اہتمام بھی کیا جائے گا۔