لاہور: وفاقی وزیر داخلہ محسن نقوی نے کہا ہے سکھ یاتریوں کیلئے پاکستان آمد پر کوئی ویزا فیس نہیں ہوگی، سکھ کمیونٹی آدھے گھنٹے میں پاکستان کا ویزا حاصل کرسکتی ہے۔

وزیرداخلہ محسن نقوی نے امریکہ سے آئے سکھ یاتریوں کو سٹیٹ گیسٹ ہاؤس میں اپنا مہمان بنا لیا۔

محسن نقوی سے امریکہ سے آئے سکھ یاتریوں کے 44 رکنی وفد کی ملاقات ہوئی، وفد کی قیادت ڈاکٹر دلویرسنگھ پنوں، سرجیت سنگھ ہوتھی، رنجیت سنگھ کاہلوں اور لکشمن سنگھ کر رہے تھے۔

وفاقی وزیر داخلہ نے پاکستان آمد پر سکھ یاتریوں کو جی آیاں نوں کہا اور ان سے گفتگو کرتے ہوئے کہا کہ  پاکستان آنے کے لئے سکھ برادری کو مسائل کا سامنا کرنا پڑتا تھا، کچھ عرصہ وزیر اعلیٰ پنجاب رہا تو سکھ برادری کے مسائل حل کرنے کی کوشش کی۔

انہوں نے کہا کہ پاکستان آنے کے خواہشمند سکھ برادری کو ویزا ایشو کا سامنا کرنا پڑتا تھا، ہم نے سکھ برادری کی سہولت کیلئے ویزے کو آن لائن کر دیا ہے۔

محسن نقوی نے کہا کہ امریکی، کینڈین اور یوکے پاسپورٹ رکھنے والی سکھ کمیونٹی آن لائن فارم جمع کرائیں اور 30 منٹ میں ویزا حاصل کریں، آن لائن ویزا کی کوئی فیس نہیں، یہ سہولت بھارتی نژاد امریکہ، کینیڈا اور برطانیہ میں مقیم سکھ برادری کے لیے بھی ہے۔

انکا کہنا تھا کہ سکھ برادری کے لیے زیادہ سہولتیں فراہم کرنا ہماری ترجیح ہے، آپ سال میں 10 بار پاکستان آئیں ہر بار آپ کو خوش آمدید کہیں گے۔

وزیر داخلہ نے کہا کہ آن لائن ویزا کے لئے صرف فارم  پر کرنا ہے، ویزا 30 منٹ میں آپ کے پاس ہو گا، جس طرح مسلمانوں کے لیے سعودیعرب ہے اسی طرح سکھ کمیونٹی کے لئے پاکستان ہے۔

انہوں نے کہا کہ پاکستان میں سکھ برادری کے دیگر مقامات کو بھی اوپن کر دیں گے، وزٹ کے لئے اجازت نامے کی ضرورت نہیں ہو گی، احسن ابدال، کرتار پور، ننکانہ صاحب، لاہور کے ساتھ آپ اپنے دیگر مقامات پر بھی جاسکیں گے، اس ضمن میں جو مسائل ہیں، انہیں حل کریں گے۔

محسن نقوی نے مزید کہا کہ اس وقت اگر سال میں 50 ہزار سے ایک لاکھ سکھ یاتری آتے ہیں تو ہماری خواہش ہے کہ یہ تعداد 10 لاکھ ہو اور نوجوان بھی آئیں، پاکستان نے 124 ملکوں کے لئے ویزا فری کیا ہے، سو بسم اللہ آپ پاکستان کرکٹ میچز دیکھنے آئیں، چیمپئنز ٹرافی کے لئے آئیں، پاک بھارت میچ دیکھنے آئیں، اس لئے خصوصی کوٹہ رکھ رہے ہیں، بھارت سے بھی بہت سے لوگوں نے میچز دیکھنے آنا ہے، خصوصی انتظامات کر رہے ہیں۔

امریکہ سے آئے سکھ یاتریوں کے وفد نے مہمان نوازی پر وزیر داخلہ محسن نقوی کا شکریہ ادا کیا اور کہا کہ فری آن لائن ویزا ہونے سے بہت سہولت ملی ہے، آپ نے ہمارے دل جیت لئے ہیں، ہم پاکستان میں سرمایہ کاری میں بھی دلچسپی رکھتے ہیں۔

واضح رہے کہ معروف صنعتکار کاشف اشفاق اور دیگر حکام بھی اس موقع پر موجود تھے۔