اسلام آباد: سعودی عرب کے وزیر برائے سرمایہ کاری، خالد بن عبدالعزیز الفالح کی قیادت میں وفد کی صدر مملکت آصف علی زرداری سے ایوان صدر میں ملاقات ہوئی ہے۔

ملاقات کے دوران پاکستان اور سعودی عرب کی جانب سے معیشت، زراعت، کان کنی اور انفارمیشن ٹیکنالوجی کے شعبوں میں تعاون بڑھانے کے عزم کا اعادہ کیا گیا۔

اس موقع پر صدر آصف زرداری نے گفتگو کرتے ہوئے کہا کہ دونوں برادر ممالک  کوخطے اور اسلامی دنیا کے خوشحال اور پرامن مستقبل کی تعمیر کے لیے کام کرنا چاہیے، پاکستان اور سعودی عرب کے درمیان طویل المدتی اور آزمودہ تعلقات ہیں۔

انہوں نے کہا کہ دونوں ممالک نے خواہش کا اظہار کیا کہ ان تعلقات کو ایک طویل المدتی اسٹریٹجک اور اقتصادی شراکت داری میں تبدیل کیا جائے، سعودی عرب کی ترقی اور خوشحالی  ہمارے لیے باعث مسرت اور فخر ہے۔

دوران ملاقات صدر آصف زرداری نے پاکستان کا سعودی عرب کے ساتھ غیر متزلزل یکجہتی کے عزم کا اعادہ کیا اور سعودی عرب کے ولی عہد اور وزیراعظم، جلالت مآب محمد بن سلمان آل سعود کی بصیرت افروز قیادت کی تعریف بھی کی۔

صدر مملکت آصف زرداری نے سعودی عرب کی ویژن 2030 کے تحت شاندار ترقی کو بھی سراہا اور سعودی عرب کا ہر مشکل گھڑی میں پاکستان کا ساتھ دینے پر شکریہ ادا بھی کیا۔

دوسری جانب سعودی وزیر برائے سرمایہ کاری نے کہا کہ سعودی عرب نے پاکستان کے تعمیری انفراسٹرکچر اور کان کنی کے شعبوں میں سرمایہ کاری کا منصوبہ بنایا ہے، سعودی وفد مختلف شعبوں میں 25 معاہدوں پر دستخط کرے گا، ان معاہدوں سے دوطرفہ اقتصادی تعاون کے نئے دور کا آغاز ہوگا۔

بعدازاں دونوں برادر ممالک نے زراعت اور انفارمیشن ٹیکنالوجی کے شعبوں میں تعاون بڑھانے پر بھی زور دیا۔