اسلام آباد: وفاقی کابینہ نے 26ویں آئینی ترامیم کے مسودے کی منظوری دے دی۔

وزیراعظم محمد شہباز شریف کی زیرصدارت وفاقی کابینہ کا اجلاس پارلیمنٹ ہاؤس میں وزیراعظم کے چیمبر میں ہوا، جس میں 26 ویں آئینی ترامیم کے مسودے کی منظوری دے دی گئی، تاہم بعض تبدیلیوں کے بعد کابینہ سے ترامیمی بل کی منظوری لی گئی۔

ذرائع نے بتایا کہ وفاقی کابینہ نے حکومت اور پیپلز پارٹی کے درمیان طے شدہ مسودے کی منظوری دی جبکہ منظور شدہ مسودے پر جمیعت علمائے اسلام بھی متفق ہے۔

 وزیراعظم نے صدر مملکت آصف علی زرداری کے ساتھ ہونے والی ملاقات سے کابینہ کو آگاہ کیا جبکہ کابینہ کو مولانا فضل الرحمان کی جانب سے موصول جواب سے بھی آگاہ کیا گیا۔

اجلاس میں آئینی ترامیم کے مسودے پر وزیر قانون اور اٹارنی جنرل نے بریفنگ دی جبکہ 26ویں آٸینی ترامیم کے مسودے میں بعض ترامیم کی تجویز پر بھی غور کیا گیا۔

اس حوالے سے وفاقی وزیردفاع خواجہ آصف کا کہنا تھا کہ آج چھٹی کے دن سب کی چھٹی ہوجائے گی، دونوں ایوانوں سے آج ترمیم پاس ہوجائے گی، اپوزیشن دعوے نہ کرے تو اور کیا کرے۔

اعلامیہ جاری

وزیراعظم محمد شہباز شریف کی زیرِ صدارت وفاقی کابینہ کا اجلاس آج اسلام آباد میں منعقد ہوا جس میں وزیرِ قانون و انصاف اعظم نذیر تارڑ نے 26 ویں آئینی ترامیم پر دوبارہ تفصیلی بریفنگ دی۔

وفاقی کابینہ نے حکومتی اتحادی جماعتوں بشمول پاکستان پیپلز پارٹی کا 26 ویں آئینی ترامیم کا مجوزہ مسودہ منظور کر لیا۔

اجلاس میں وزیرِاعظم نے گفتگو کرتے ہوئے کہا کہ پاکستان کی ترقی و خوشحالی اور ملکی حالات کی بہتری کیلئے کابینہ نے بہترین فیصلہ کیا، پوری قوم کو 26 ویں آئینی ترامیم کی کابینہ سے منظوری کی مبارکباد دیتا ہوں۔

انہوں نے کہا کہ کابینہ نے ملکی ترقی اور عوامی فلاح کے حلف کی پاسداری کرتے ہوئے ملکی وسیع تر مفاد میں فیصلہ کیا، اللہ کے فضل و کرم سے ملکی معیشت کے استحکام کے بعد ملک کے آئینی استحکام اور قانون کی حکمرانی کیلئے ایک سنگ میل عبور ہوا۔

وزیرِاعظم نے مزید کہا کہ عوام سے کیے گئے اپنے وعدے کے مطابق ملک کی ترقی، خوشحالی اور استحکام کیلئے محنت جاری رکھیں گے۔

دوران اجلاس وزیرِ اعظم نے اتحادی جماعتوں کے سربراہاں کا خصوصی شکریہ ادا کیا۔

اس موقع پر وزیرِ اعظم نے چیئرمین پاکستان پیپلز پارٹی بلاول بھٹو زرداری، نائب وزیرِاعظم و وزیرِ خارجہ اسحاق ڈار، وزیرِ قانون و انصاف اعظم نذیر تارڑ، وزیرِداخلہ محسن رضا نقوی، مشیرِ وزیرِ اعظم رانا ثناء اللہ اور وزیرِ اطلاعات و نشریات عطاء اللہ تارڑ کی کوششوں کو بھی سراہا۔